U hety tryvožny čas pandemii teatry Biełarusi i śvietu pakazvajuć svaje najlepšyja śpiektakli anłajn, kab ludzi mahli ratavacca mastactvam.
Paniadziełak: «Biasieda», «Novy teatr» (Varšava)
Fota Magda Hueckel
Pamiatajecie mahičnaha Bartaša Bialeniu z naminavanaha na «Oskar» filma «Božaje Cieła»? Jaho možna pabačyć nie ŭ kino, a na teatralnaj scenie — u varšaŭskim «Novym teatry».
Siońnia da apoŭnačy tut možna pahladzieć hullivuju «Biasiedu», pastaŭlenuju pavodle dyjałohu Płatona adnym z «najharačejšych» teatralnych režysioraŭ Polščy Kšyštafam Harbačeŭskim. U vynachodlivaj, žartaŭlivaj, eratyčnaj adaptacyi kłasičnaha tekstu Sakrat, Arystafan, Ahafon dy inšyja źbirajucca na čarhovuju tusoŭku, vyrašajuć, što paśla ŭčorašniaj papojki varta pić mienš, i zavodziać razmovu pra kachańnie. Pastanoŭka idzie na polskaj movie i supravadžajecca anhlijskimi subcitrami.
Dzie hladzieć: pa spasyłcy
Kali hladzieć: zapis dastupny da apoŭnačy 13 krasavika
Aŭtorak: «Kałasy pad siarpom tvaim», Respublikanski teatr biełaruskaj dramaturhii
Pastanoŭka pavodle adnajmiennaha ramana Uładzimira Karatkieviča niekalki hadoŭ išła na scenie RTBD z anšłahami, ale ŭ 2013 hodzie z pačatkam novaha siezona źnikła z repiertuaru. Heta tłumačyłasia znošanaściu dekaracyj i niemažlivaściu zadziejničać peŭnych akcioraŭ, ale pasaž byŭ tym nie mienš paraŭnany ź nieaficyjnaj zabaronaj «Tutejšych» Mikałaja Pinihina, što źnikli sa sceny Kupałaŭskaha teatra paśla šasnaccaci hadoŭ paśpiachovych vychadaŭ da publiki. U anłajn-pakazie śpiektakl «Kałasy pad siarpom tvaim» režysiora Valeryja Anisienki budzie pradstaŭleny ŭ zapisie 2010 hoda.
Dzie hladzieć: na Youtube-kanale RTBD
Kali hladzieć: a 19 hadzinie 14 krasavika
Sierada: «Džen Ejr», Karaleŭski nacyjanalny teatr (Łondan)
nationaltheatre.org.uk
Teatr, mastackim kiraŭnikom jakoha ŭ svoj čas byŭ Łoŭrens Aliŭje, a siońniašnim apiekunom źjaŭlajecca hiercahinia Sasekskaja Miehan, pakazvaje, jak u sučasnaści možna stavić «kaściumnyja» dramy. Śpiektakl «Džen Ejr» pavodle adnajmiennaha ramana Šarłoty Bronte adhukajecca ŭ paradku dnia fieministyčnym pasyłam: hałoŭnaja hierainia Džen pieražyvaje biednaść, žorstkaść i zdrady, ale zmahajecca za svabodu i prava samoj vyrašać svoj los.
Zapis śpiektakla supravadžajecca ruskimi subcitrami. Paśla zaviaršeńnia tranślacyi «Džen Ejr» teatr uklučyć «Vostraŭ skarbaŭ» pavodle Ściviensana.
Dzie hladzieć: spasyłka dastupnaja na sajcie
Kali hladzieć: da 16 krasavika
Čaćvier: «Čaadski» Alaksandra Manackova i Kiryła Siarebranikava, «Hielikon-opiera» Maskva
Fota helikon.ru
«Čaadski» byŭ nazvany opiernym śpiektaklem hoda ŭ Rasii. Režysiora, jakoha my taksama viedajem pa filmach «Hrajučy achviaru», «Vučań» ci «Leta», ciapier možna ŭbačyć i ŭ teatry: u jaho «Čaadskim» sumiaščajucca vobrazy Čackaha i Čaadajeva, Sofja ŭ spartyŭnym kaściumie krucić piedali viełatrenažora, a płatformu z akciorami trymajuć sorak žyvych «atłantaŭ». Pastanoŭka źjaŭlajecca nie tolki prykładam taho, jakoj moža być sučasnaja opiera, ale i vykazvańniem peŭnaj hramadzianskaj pazicyi, za najaŭnaść jakoj, zdajecca, Siarebranikaŭ u vyniku i paciarpieŭ.
Dzie hladzieć: pa spasyłcy
Kali hladzieć: zapis dastupny da 26 červienia
Piatnica: «Hamlet», teatr «Hłobus» (Łondan)
Lehiendarny teatr na bierazie Temzy «Hłobus», dzie Uiljam Šekśpir byŭ adnym z akcyjanieraŭ i dla jakoha jon pisaŭ svaje pjesy, byŭ razabrany purytanami jašče ŭ siaredzinie XVII stahodździa, ale ŭ kancy 1990-ch uźviedzieny nanoŭ na miescy znojdzienych pareštkaŭ. Tak, Šekśpir nie ihraŭ na scenie mienavita hetaha «Hłobusa», ale havorka idzie pra ŭsio toj ža open-ejr teatr, dzie jość niekalki sotniaŭ stajačych miescaŭ, a śpiektakli ihrajucca tolki ŭ ciopłuju paru. I dzie, viadoma ž, stavicca Šekśpir: hetymi dniami na Youtube-kanale «Hłobusa» dastupny zapis pastaŭlenaha ŭ 2018 hodzie «Hamleta», ułasna najviadomiejšaj trahiedyi kłasika. Z pryvabnaj dolaj humaru tut pakazvajucca i palityčnyja intryhi, i fiłasofskija razvahi, i seksualnaja apantanaść.
Zapis supravadžajecca anhlijskimi subcitrami.
Dzie hladzieć: spasyłku šukajcie na sajcie
Kali hladzieć: zapis dastupny da 19 krasavika
Subota: «Pieleas i Mielizanda», «Kamičnaja opiera» (Bierlin)
Fota E. Carecchio
Heta adzinaja zakončanaja opiera znakamitaha impresijanista ad muzyki Kłoda Dziebiusi, jakuju toj pisaŭ na praciahu dziesiaci hadoŭ. Liryčnaja drama adbyvajecca ŭ Siaredniavieččy: prync Hoła sustrakaje ŭ lesie Mielizandu, pryvodzić zahadkavuju nieznajomku ŭ pałac u jakaści žonki i prosić brata Pieleasa dapamahčy ŭ adnosinach ź dziedam-karalom.
Bierlinskaja «Kamičnaja opiera» zrabiła pastanoŭku ŭ čorna-biełych kolerach i biez asablivych dekaratyŭnych vykrutasaŭ, kab nahadać, «što sapraŭdy važna ŭ muzyčnym teatry». Pry hetym aŭtary nie stylizavali opieru pad Siaredniaviečča, i vykanaŭcy tut apranutyja ŭ kaściumy z halštukami i sučasnyja sukienki.
Zapis supravadžajecca anhlijskimi subcitrami.
Dzie hladzieć: pa spasyłcy
Kali hladzieć: zapis dastupny da 8 lipienia
Niadziela: 60-chvilinnaje šou, Cyrk dziu Salej
Fota flickr.com
Kožnuju piatnicu znakamitaja kampanija, što ŭ vidoviščnych vystupach pajadnoŭvaje muzyku, chareahrafiju i cyrkavoje mastactva i da taho ž nikoli nie vykarystoŭvaje ŭ svaich šou žyvioł, publikuje novaje hadzinnaje videa. Viadoma, vybirać jość z čaho: Cyrk dziu Salej ujaŭlaje saboj niekalki trup, što vystupajuć nie tolki ŭ Łas-Viehasie, ale i ŭ šatrach padčas hastrolnych turaŭ. Ciapier na Youtube-kanale kampanii dastupnyja ŭžo try zapisy, u jakich bačnaje majsterstva trupy ŭ skokach, tancach, śpievach i ŭvohule pravakacyi na zachapleńnie.
Dzie hladzieć: na sajcie cyrka
Kali hladzieć: zapisy abnaŭlajucca štotydzień i zastajucca ŭ dostupie
