Amierykanski miljarder i fiłantrop Bił Hiejts zajaviŭ u intervju bbc.com, što vakcyna suprać karanavirusa moža być hatovaja praz paŭtara hoda, ale dla masavaj vytvorčaści preparata śvietu, mahčyma, pryjdziecca źmiakčyć zvyčajnyja pracedury pravierki biaśpieki.
«Uradam pryjdziecca vyrašyć, ci treba vyzvalić ad adkaznaści kampanii i skazać im: «Napierad, za spravu!» — u situacyi, kali ŭ nas prosta niama času, kab zrabić usio pa zvyčajnych praviłach».
U siaredzinie sakavika miedycynski karespandent Bi-bi-si Džejms Hałachier paviedamlaŭ, što navukoŭcy ŭžo raspracavali niekalki varyjantaŭ vakcyny suprać Covid-19 i ciapier testujuć ich na žyviołach. Kali testy projduć paśpiachova, nastupny etap — vyprabavańni na ludziach — moža pačacca ŭžo ŭ hetym hodzie.
Namahańni vučonych uskładniaje toj fakt, što ŭ śviecie mohuć isnavać adrazu niekalki raznavidnaściaŭ karanavirusa.
Tym časam viadučy brytanski navukoviec pa baraćbie z karanavirusam — pradstaŭnik Wellcome Trust Džeremi Farar — zajaviŭ u intervju Bi-bi-si, što raspracoŭka vakcyny budzie ŭskładniena jašče i tym, što analizy niekatorych ludziej, jakija pierachvareli Covid-19, pakazvajuć prysutnaść virusa ŭ druhi raz.
Heta adbyłosia z amal 100 pacyjentami ŭ Paŭdniovaj Karei, i navukoŭcy pakul nie razumiejuć, ci aznačaje heta, što virus zastajecca aktyŭnym u kryvi albo hetyja ludzi zaražajucca paŭtorna.
Dabračynny fond zasnavalnika kampanii Microsoft — u liku tych, što finansujuć raspracoŭku vakcyny suprać Covid-19. Pa słovach Hiejtsa, tolki vakcynacyja dazvolić viarnucca da ładu žyćcia, što isnavaŭ da pandemii Covid-19.
Bił Hiejts, jaki daŭno ŭžo papiaredžvaŭ pra mahčymuju hłabalnuju pandemiju, taksama skazaŭ, što na raspracoŭku novaj vakcyny vydatkoŭvajecca niedastatkova srodkaŭ, choć baraćbu z karanavirusam užo paraŭnoŭvajuć z vajnoj, a na biaśpieku vydatkoŭvajucca značna bolš istotnyja hrošy.
«Byŭ pieryjad, kali i ja, i ekśpierty ŭ halinie miedycyny kazali, što pandemija moža stać najbujniejšaj katastrofaj, ź jakoj kali-niebudź sutykałasia čałaviectva, — skazaŭ Hiejts Bi-bi-si. — Jašče ŭ 2015 hodzie ja kazaŭ pra hetu pahrozu».
«Z časam my pahladzim na ŭsio heta, i vielmi mała krain atrymajuć adznaku «vydatna», tamu što bolšaść prosta sprabuje reahavać na toje, što adbyvajecca, my nie byli da hetaha hatovyja, — zajaviŭ zasnavalnik kampanii. — Nichto nie rychtavaŭsia da hetaha, nie sprabavaŭ dumać pra toje, što moža adbycca. U vyniku my apynulisia na niaźviedanaj terytoryi ŭ tym, što tyčycca arhanizacyi achovy zdaroŭja i ekanamičnaj palityki».
U siaredzinie sakavika paviedamlałasia, što ŭ ZŠA pačalisia pieršyja vyprabavańni vakcyny suprać karanavirusa na dobraachvotnikach. Raspracoŭku hetaj vakcyny finansuje Nacyjanalny instytut achovy zdaroŭja ZŠA.
Adnak ekśpierty taksama prahnazavali, što navat kali hetyja vyprabavańni projduć paśpiachova, to da momantu, pakul vakcyna stanie ahulnadastupnaj, moža prajści jašče paŭtara hoda.
