Za abciakalnymi farmuloŭkami misii SAAZ na pres-bryfinhu pa vynikach pracy misii ŭ Biełarusi chavajecca «surjozny raznos», piša analityk Andrej Jelisiejeŭ.
«Naturalna, kiraŭnik misii SAAZ Patryk O'Konar imkniecca ŭsio achinuć u dypłamatyčnuju formu, i tym surjoźniej treba traktavać jaho farmuloŭki», — piša Jelisiejeŭ.
O'Konar ni słova nie skazaŭ pra toje, što paŭtarała Ministerstva achovy zdaroŭja: maŭlaŭ, heta pavieličeńnie kolkaści testaŭ u bolšaj stupieni abumoviła rezki rost statystyki vypadkaŭ infikavańnia. O'Konar adnaznačna dvojčy zajaviŭ, što Biełaruś uvajšła «ŭ novuju fazu evalucyi ŭspyški».
Kiraŭnik misii SAAZ taksama zrabiŭ vielmi adnaznačny namiok, što, maŭlaŭ, inšyja krainy taksama śćviardžali, što majuć dastatkovuju jomistaść miedycynskich ustanoŭ, ale ich sistemy byli chutka «pachavanyja» pad kolkaściu špitalizacyj, što vyrasła.
Niekalki cytat O'Konara:
— «Situacyja vyklikaje niespakoj i patrabuje novych mier»;
— «Miery, jakija achoplivajuć usio hramadstva, pavinny być zachavany i ŭzmocnieny»;
— Nieabchodna praduchilać masavyja zbory ludziej, «u tym liku na spartyŭnych i kulturnych mierapryjemstvach», prypynić nieabaviazkovyja vidy dziejnaści i inš.;
— «Stanovicca krytyčna važnym, kab usie ŭzroŭni ŭłady ŭzajemadziejničali z hramadstvam, kab ludzi razumieli ryzyki»;
— «Čas rychtavacca da horšych scenaraŭ».
Analityk adznačaje, što ministr achovy zdaroŭja ŭ hety ž čas usio źmiakčaje i sychodzić ad pytańniaŭ, krytykuje žurnalistaŭ za «biescyrymonnaje ŭmiašańnie» ŭ asabistaje žyćcio pacyjentaŭ. Maŭlaŭ, heta žurnalisty vinavatyja ŭ tym, jak dazavana stali padavać infarmacyju pra raźvićcio epidemii.
Taksama analityk źviartaje ŭvahu, što ŭ chodzie bryfinhu kiraŭnik misii SAAZ adchiliŭ tuju łžyvuju dylemu, jakuju ŭžo bolš za miesiac staranna malujuć biełaruskija ŭłady i dziaržaŭnyja ŚMI: albo niedastatkovyja miery jak zaraz, albo tatalny karancin.
Nieabaviazkova ŭvodzić tatalny karancin i kamiendanckuju hadzinu, ale važna svoječasova pryniać kompleks roznych zachadaŭ pa źmianšeńni mižčałaviečych kantaktaŭ, skazaŭ kiraŭnik misii Patryk O'Konar.
