Saŭładalnik i vice-prezident rasijskaj kampanii Łukojł Leanid Fiadun ličyć ceny na naftu, jakija ŭčora apuścilisia nižej za $25 za baral, katastrafičnymi. Pra heta jon skazaŭ u intervju RBK.
Na dumku Fieduna, hałoŭnaja pryčyna abvału naftavych kacirovak — razvał ździełki APIEK+ ab skaračeńni zdabyčy nafty i naroščvańnie zdabyčy asnoŭnymi krainami-eksparciorami.
«Tak, ciapier karanavirus udaryŭ pa ekanomicy. Ale toj naftavy šok, jaki adbyŭsia, jon daje canu prykładna, pa našych padlikach, ad $20 da $25 minus ad ciapierašniaj cany», — skazaŭ saŭładalnik Łukojła. Jon dadaŭ, što kali b bakam udałosia damovicca ab praciahu ździełki, to baral nafty zaraz kaštavaŭ by kala $50.
Pa słovach Fieduna, na naradzie naftavikoŭ z prezidentam Uładzimiram Pucinym, jakaja adbyłasia za niekalki dzion da razvału pahadnieńnia APIEK+, «nijakaja ideja ab vychadzie [Rasii] z uhody nie abmiarkoŭvałasia».
«Choć ja viedaju, što asobnyja dziaržaŭnyja kampanii jaje [ideju ab vychadzie sa ździełki APIEK+] aktyŭna łabiravali. Navat tyja, chto łabiravali, nie mahli sabie ŭ strašnym śnie ŭjavić, što buduć pradavać naftu pa $25», — adznačyŭ jon.
