Paśla Isłandyi i Łatvii — Vuhorščyna.
Premjer‑ministr Vuhorščyny Ferenc Dziurčań padaŭ u adstaŭku sa svajoj pasady pad ciskam kryzisnych padziejaŭ. Jon prapanavaŭ svajoj Sacyjalistyčnaj partyi znajści inšaha, papularniejšaha premjera.
Pokul što kryzis nie vyklikaŭ vialikich vuličnych pratestaŭ u Budapiešcie, u adroźnieńnie ad Ryhi, Vilni, Dublina, Rejkjavika.Heta pry tym, što pratesty byli vybuchali dva hady tamu, kali žurnalistam udałosia zapisać na stužku pryznańni Dziurčania adnapartyjcam, što «my łhali i ŭvieś čas iłhali» pra sapraŭdny stan ekanomiki krainy. Stan toj byŭ sapraŭdy nievažniecki. Siońnia Vuhorščyna napieradzie Jeŭropy ŭsioj pa devalvacyi nacyjanalnaj valuty — forynta, a kab uratavacca, pryjšłosia brać astranamičnyja kredyty ES i MVF. Voś tak Vuhorščyna pad kiraŭnictvam postkamunistaŭ adstała ad svaich susiedziaŭ z Čechii, Słavaččyny i Słavienii, ź jakimi na vychadzie z kamuny jana była amal naroŭni.
0
0
0
0
0
0
