Uviečary ŭ niadzielu, 8 sakavika, u Vilejskaje RAUS pastupiła paviedamleńnie pra toje, što ŭ ahraharadku Illa, što pad Vilejkaj, BMV źjechaŭ u kiuviet, za rulom byŭ, mierkavana, pjany kiroŭca.
«Supracoŭniki DAI zaŭvažyli hety aŭtamabil kala parka pa vulicy Savieckaj. Padčas razboru adzin z pasažyraŭ pieraškadžaŭ viadzieńniu administracyjnaha pracesu: hrukaŭ rukami pa słužbovym aŭto, abražaŭ milicyjantaŭ, paśla adnamu ź ich nanios udar kułakom u tvar.
Na nieadnarazovyja papiaredžańni pra mahčymaje prymianieńnie fizičnaj siły, śpiecsrodkaŭ i ahniastrelnaj zbroi jon nie adreahavaŭ. Adbylisia try papieradžalnyja streły ŭ pavietra, a zatym — prycelny ŭ nahu», — paviedamiła pres-słužba MUS.
Častku dyjałohu pamiž daišnikam i chulihanam MUS vykłała ŭ sieciva:
Paśla strełu milicyjanta na miesca zdareńnia vyklikali chutkuju, daktary akazali paciarpiełamu pieršuju dapamohu. Paśla jon byŭ špitalizavany.
Mužčyna, jaki ŭdaryŭ daišnika, — 34-hadovy minčuk Alaksiej Koŭzik.
Ciapier Koŭzik u balnicy, kala dźviarej pałaty vystaŭleny kanvoj. Padčas bojki z daišnikami jon byŭ pjany: kolkaść ałkaholu ŭ vydychanym pavietry skłała 1,48 pramile.
Jak paviedamlaje milicyja, Koŭzik sudzimy za kradziažy.
«Naša Niva» źviazałasia ź siabrami i svajakami Koŭzika, jany nie zachacieli abmiarkoŭvać incydent. Žonka Alaksieja taksama admoviłasia ad kamientaŭ.
