Źnižeńnie cenaŭ na naftu saudaŭskaj naftavaj karparacyjaj Saudi Aramco, skiravana na asłableńnie pazicyj Rasii na suśvietnym rynku hetaha enierhanośbita. Z takim mierkavańniem vystupiła ŭ niadzielu hazieta The Wall Street Journal sa spasyłkaj na krynicy ŭ Arhanizacyi krain-eksparcioraŭ nafty (APIEK) i nienazvanych pradstaŭnikoŭ uładaŭ Saudaŭskaj Aravii.
Pavodle vydańnia, taki chod z boku saudaŭskaj karparacyi «źjaŭlajecca elemientam ahresiŭnaj kampanii pa zachopie doli rasijskaha siehmienta rynku». The Wall Street Journal piša, što ŭ subotu ŭviečary kiraŭnictva Saudi Aramco paviedamiła pakupnikam, što z krasavika kampanija źnižaje canu na pastaŭki syraviny ŭ ZŠA — na $7 za baral, u krainy Paŭnočnaj Jeŭropy — na $8, u krainy Uschodniaj i Paŭdniova-Uschodniaj Azii — na $6.
Pradstaŭnik uładaŭ Saudaŭskaj Aravii paviedamiŭ The Wall Street Journal, što źnižeńnie skiravana naŭprost na asłableńnie rasijskich pazicyj. Pry hetym vydańnie padkreślivaje, što na taki krok saudaŭski bok pajšoŭ paśla pravału pieramoŭ ab dadatkovym skaračeńni zdabyčy nafty krainami APIEK +.
Pa hetaj ža pryčynie cana fjučarsa na naftu marki Brent z pastaŭkaj u mai 2020 hoda na biržy ICE ŭ Łondanie źniziłasia ŭ niadzielu da $31,02 za baral. Cana krasavickaha fjučarsa nafty marki WTI apuściłasia na 27,1% — da $32,48 za baral.
APIEK prapanoŭvała dadatkova źnizić zdabyču na 1,5 młn baralaŭ u sutki da kanca biahučaha hoda. Adnak suprać hetaj prapanovy vystupili Rasija i Kazachstan. RF, u pryvatnaści, nastojvała na praciahu biahučych damoŭlenaściaŭ tolki na druhi kvartał, adznačaje tass.ru.
