Kantrolny adździeł štaba pa vyłučeńni adzinaha kandydata ad apazicyi na prezidenckija vybary skončyŭ pravierku podpisaŭ Hanny Kanapackaj i Volhi Kavalkovaj, jakija zachacieli pasprabavać svaje siły ŭ jakaści niezaležnych kandydatak. Samavyłučenki pavinny byli pradstavić pa 200 podpisaŭ svaich prychilnikaŭ. I Kavalkova, i Kanapackaja heta zrabili.
Ahułam kantrolnaja kamisija ŭziała pa 102 podpisy imaviernych kandydatak dla pravierki. Da podpisaŭ Volhi Kavalkovaj nie ŭźnikła nijakich pytańniaŭ. Usie aŭtohrafy i ludzi vyjavilisia sapraŭdnymi. A voś z Hannaj Kanapackaj uźnikli peŭnyja prablemy.
Staršynia kantrolnaha adździeła Piatro Hołasaŭ raskazaŭ «NN», što Hanna Kanapackaja padčas pravierki zapatrabavała spynić praceduru na try dni. «Jana mierkavała, što danyja ludziej, jakija za jaje padpisalisia, mohuć być raspaŭsiudžanyja vonki. I tamu vyvučała pytańnie niedatykalnaści danych. Kali try dni skončylisia, ale zajavy ad Kanapackaj nie pastupiła, kantrolny adździeł praciahnuŭ svaju pracu», — kaža Piatro Hołasaŭ.
Isnuje nieaficyjnaja viersija, što za hetyja try dni Hanna Kanapackaja mahła likvidavać šurpataści, jakija isnavali ŭ jaje śpisie, ale, viadoma, nijakich dokazaŭ hetamu niama.
«U vyniku ŭ Kanapackaj byli vyjaŭleny 3 niesapraŭdnyja podpisy z 102. Heta ŭ miežach dapuščalnaj normy.
Tym nie mienš pra ŭsie pytańni, jakija byli padčas pravierki, budzie dakładziena na pasiedžańni štaba 28 lutaha», — raskazvaje Hołasaŭ.
I choć podpisy Kanapackaj prajšli pravierku, jana ŭsio adno moža nie stać kandydatam na hetych apazicyjnych prajmieryz.
Sprava ŭ tym, što dla jaje rehistracyi patrebnaja adzinahałosnaje rašeńnie piaci palityčnych subjektaŭ, jakija zapačatkavali prajmieryz — AHP, BCHD, Partyja BNF, Rucha «Za Svabodu» i BSDP. A voś z hołasam AHP mohuć uźniknuć vialikija pytańni.
Hanna Kanapackaja 1 śniežnia 2019 hoda była vyklučanaja z šerahaŭ AHP. «Z pryčyny nieadnarazovych parušeńniaŭ Hannaj Kanapackaj Statutu AHP, straty davieru partyi da Kanapackaj i straty Kanapackaj suviazi z partyjaj, Palitrada AHP vyrašyła vyklučyć Kanapackuju z AHP», — havaryłasia ŭ aficyjnaj zajavie. Pierad hetym partyja admoviłasia padtrymać vyłučeńnie Kanapackaj na parłamienckija vybary.
U čym mohuć być pretenzii AHP da byłoj deputatki Pałaty pradstaŭnikoŭ? Pa infarmacyi «NN», AHP budzie nastojvać na tym, što Kanapackaja nie źjaŭlajecca apazicyjnym palitykam, a taksama pasprabuje dakazać, što jaje podpis ničoha nie varty.
Prablema ŭ tym, što Kanapackaja pastaviła svoj aŭtohraf pad «Płatformaj apazicyjnaha deputata», paabiacaŭšy kožny svoj vystup u parłamiencie zakančvać słovami pra toje, što ŭ krainie niama vybaraŭ. Adnak tak i nie stała vykonvać hety dakumient.
Druhi punkt pretenzij datyčycca situacyi, kali Kanapackaja, niahledziačy na abiacańni, tak i nie padała ŭ hienieralnuju prakuraturu tečku ź fiksacyjaj parušeńniaŭ parłamienckich vybaraŭ, jakuju sabrała Taćciana Karatkievič.
Staršynia AHP Mikałaj Kazłoŭ kaža, što jon asabista nie budzie prymać rašeńnie pa rehistracyi ci nierehistracyi Kanapackaj, a vykanaje rašeńnie Palitrady AHP. «Ja da jaje staŭlusia nijak, ja nie razumieju, čaho jana choča i čaho dabivajecca. Pry hetym nie razumieju, čamu mianie zaŭsiody ŭ niečym abvinavačvajuć. Prajmieryz — heta surjoznaje pytańnie, i da jaho treba stavicca nie jak da šou. Davajcie šou budzie ŭ niezaležnaj dziaržavie. Mianie turbuje, čamu hety praces pieraŭtvarajuć u cyrk i bałahan», — kaža Kazłoŭ.
«Šmat čaho, što jana mnie prypisvaje, ja nie rabiŭ i nie havaryŭ. Spytajcie ŭ Kanapackaj, ci pamiataje jana, što padpisała rašeńnie ab tym, što Łukašenka niezakonna znachodzicca na pasadzie i nie maje prava ŭdzielničać u vybarach. Spytajcie, bo raniej u jaje ŭźnikali ciažkaści z hetym usprymańniem. Vielmi chaciełasia b pačuć adkaz na takoje fundamientalnaje pytańnie, a jana zaciahvaje ŭ cyrk», — skazaŭ kiraŭnik AHP.
Rehistracyja kandydataŭ na prajmieryz budzie adbyvacca 4 sakavika na Palitradzie kiraŭnikoŭ piaci partyj. Juraś Hubarevič z Ruchu «Za Svabodu», Pavieł Sieviaryniec z BCHD, Alaksiej Janukievič z Partyi BNF i Mikałaj Kazłoŭ z AHP byli vyłučanyja ad svaich palityčnych struktur.
