25 lutaha šerah ŚMI apublikavali navinu pra toje, što Biełaruś znoŭ uznačaliła rejtynh samych pituščych krainaŭ śvietu. «Radyjo Svaboda» tłumačyć, čamu heta nie tak.
14,4 litra śpirtu na čałavieka štohod vypivajuć u Biełarusi — takuju navinu apublikavali šerah biełaruskich ŚMI sa spasyłkaj na rejtynh World Population Review.
Ale, jak vyśvietliła «Svaboda», heta fejk. Nasamreč u rejtynhu prosta ŭziali źviestki z ahladu Suśvietnaj arhanizacyi zdaroŭja za 2014 hod.
Na samoj spravie ŭ Jeŭropie Biełaruś zajmaje 23 miesca pa spažyvańni ałkaholu. U takim ža suśvietnym rejtynhu Biełaruś na 27 miescy. Pra heta skazaŭ pradstaŭnik Suśvietnaj arhanizacyi achovy zdaroŭja ŭ Biełarusi Batyr Bierdykłyčaŭ:
«My zaraz razabralisia, jany prosta nie pravieryli ličby i zrabili spasyłku na spravazdaču 2014 hoda, jakaja hruntujecca na danych 2010 hoda, — skazaŭ Batyr Bierdykłyčaŭ. — 11,2 litra spažyvańnia śpirtu na čałavieka — takija źviestki pa hłabalnaj spravazdačy SAAZ za 2018 hod. I kali ŭ 2014 hodzie byli sprečki z boku Minzdaroŭja, to ciapier u nas poŭnaja zhoda pa metadałohii i vynikach».
U 2018 hodzie, pa statystycy SAAZ, samaj pituščaj była Małdova (15,2 litra śpirtu na čałavieka na hod), Litva (15 litraŭ), Čechija (14,4 litra), Niamieččyna (13,4 litra), Nihieryja (13,4 litra).
Bolš, čym u Biełarusi, pili ŭ Łatvii (12,9 litra), Rasii (11,7 litra), Polščy (11,6 litra).
Pa statystycy Biełstata, spažyvańnie ałkaholu ŭ Biełarusi — 11,5 litra śpirtu na kožnaha žychara, starejšaha za 15 hadoŭ. Najbolš spažyvajuć piva, harełku i pładovaje vino. Najmienš — kańjak i brendzi.
Pavodle SAAZ, spažyvańnie bolš jak 8 litraŭ śpirtu na hod niasie nie tolki pahrozu žyćciu, ale i viadzie da dehradacyi hramadstva.
