Adkryvaje časopis paema Uładzimira Niaklajeva «Vavuki», napisanaja ŭ šviedskim Łundzie, dzie paet ciapier žyvie.
Taksama ŭ paetyčnaj častcy — vieršy Ludmiły Paŭlikavaj-Chiejdaravaj, Mikoły Hila, Anatola Brusieviča, Vadzima Korania.
Prazaičnaja častka numara pačynajecca z apovieści hałoŭnaha redaktara «Dziejasłova» Barysa Piatroviča «Puciavina». Apovieść pisałasia praz tryccać hod paśla pajezdki aŭtara na Sachalin i źjaŭlajecca praciaham apovieści «Pucina». Cikava, što ŭ kancy hetaha tvora, jak i ŭ vypadku z paemaj Niaklajeva, paznačana šviedskaja łakacyja — horad Viśbiu.
U numary drukujecca pačatak jašče adnoj apovieści — «Naščadki kazionnaha losu» Viktara Kaźko, pryśviečanaj niaprostamu konu paślavajennaha pakaleńnia biazbaćkavičaŭ.
Amataraŭ prozy lutaŭski «Dziejasłoŭ» paraduje taksama «Viaskovymi historyjami» Michasia Ziziuka, apaviadańniem Leanida Levanoviča «Pčalinaja viernaść», a taksama — apaviadańniem Ksienii Kryvieckaj «Naradzicca nanova» (rubryka Debiut).
Rubryka Pierakłady pradstaŭlenaja vieršavanymi nizkami dvuch ukrainskich paetaŭ — metra, łaŭreata Dziaržaŭnaj premii Ukrainy Dźmitra Paŭłyčki ŭ pierakładzie Michasia Skobły, a taksama — «mienskim cykłam» Viačasłava Lavickaha, paeta, viadomaha mienskaj publicy pa niadaŭnim feście «Vieršy na asfalcie» (pierakład Sierža Minskieviča).
U rubrycy Słovy — hutarka ź italjanskim litarataram Alda Anaraci «pra italjanskuju litaraturu i nie tolki», u jakoj biełaruski čytač pabačyć proćmu paralelaŭ ź situacyjaj našaha litaraturnaha pracesu.
Rubryka Kantekst. «Vialikaje Kniastva paezii Alesia Razanava» (pierakład Haliny Linkievič). Śviedčańni litoŭskich kalehaŭ pra knihu «Litoŭskija punkciry», napisanuju Razanavym ad pačatku pa-litoŭsku.
Valancin Akudovič praciahvaje drukavać svaje ŭspaminy. Hetym razam spadar Valancin raspaviadaje pra historyju paŭstavańnia pieršaha biełaruskaha fiłasofskaha časopisa «Frahmienty».
Taksama ŭ numary: staronki z novaj knihi Alžbiety Kiedy, malunki z dziacinstva Kastusia Tarasava, štrychi da tvorčaha partreta Alesia Ksiondzava i hutarka Uładzimira Siŭčykava z mastakom, repradukcyi tvoraŭ jakoha ŭpryhožyli vokładku 104-ha «Dziejasłova».
U rubrycy Knihapis — recenzija Eduarda Dubianieckaha na knihu Śviatłany Javar «Dzivosny sad», a taksama — vodhuk Leanida Hałuboviča na knihu litaraturnaj krytyki Paŭła Abramoviča «Moj sposab čytańnia», jakaja niadaŭna pabačyła śviet u biblijatecy «Dziejasłova».
Tradycyjna zaviaršaje numar ahlad knižnych navinak Dziejapis.
