31 studzienia ŭviečary ŭ KPP «Łavaryški» mytniki pravieryli hruz došak ź Biełarusi i znajšli tajnik z 280 tysiačami pačak cyharet. Sioleta heta najbujniejšy kantrabandny hruz z zatrymanych u Litvie. Jaho košt — amal miljon jeŭra, paviedamlaje abw.by.
Kiroŭca ciahača Iveco, biełarus, prybyŭšy ŭ punkt propusku, raspavioŭ mytnikam, što viazie ŭ Litvu doški. Ale mytniki viedali, što draŭnina čaściakom źjaŭlajecca prykryćciom dla kantrabandy, i vyrašyli pravieryć hruzavik z dapamohaj mabilnaj sistemy renthienaŭskaha kantrolu. Jany vyjavili vialikuju partyju kantrabandnych cyharet — 280.000 pačak siami marak. Ahulny košt zatrymanaha hruzu — 977.000 jeŭra z usimi padatkami. Cyharety znachodzilisia ŭ pieršaj pałovie paŭpryčepa, a ŭ druhoj u siaredzinie aficyjnaj zahruzki taksama była pustaja połaść, u jakuju byli zahružanyja cyharety.
Kiroŭca i hruz zatrymanyja, raspačata rasśledavańnie. 2 lutaha sud dazvoliŭ uziać kiroŭcu pad aryšt na miesiac.