Sistemu apłaty ŭ aŭtobusach Minska buduć błakavać, jak tolki transpartny srodak adjedzie ad prypynku. Hetuju infarmacyju TUT.BY paćvierdzili ŭ «Minsktransie».
U niekatorych aŭtobusach u Minsku ŭžo hučyć novaja abviestka — pra toje, što apłatu prajezdu treba rabić da pačatku ruchu transpartu. A padčas ruchu sistema błakujecca i apłacić prajezd užo niemahčyma.
U «Minsktransie» infarmacyju paćvierdzili: abviestki ŭžo puścili ŭ aŭtobusach, ale navinku jašče nie ŭviali.
— U praviłach pieravozki pasažyraŭ aŭtobusami napisana, što treba apłačvać prajezd da pačatku pajezdki, — adznačyŭ namieśnik hiendyrektara «Minsktransu» Viktar Tozik. — Tak, i sistema budzie błakavacca, kab pasažyry nie stajali kala dźviarej i nie čakali, kali ŭbačać kantralora na najbližejšym prypynku, kab chucieńka prakampaściravać tałon.
Usio nakiravana na toje, kab ludziej prymusić płacić, kab nichto nie jeździŭ zajcam.
Pradstaŭnik «Minsktransa» ličyć, što nijakaj mituśni kala ŭvachodu nie budzie, bo validataraŭ u sałonie aŭtobusaŭ «dastatkova».
— U nas hetyja validatary visiać na ŭsich dźviarach pa dva — što pieraškadžaje apłacić? Pracavać budzie tak: kiroŭca hladzić u lusterka, naciskaje knopku, i dźviery začyniajucca, aŭtobus pačynaje jechać. Paśla pačatku ruchu, siekund za 15, sistema budzie błakavacca.
