Pryvatny biznes-samalot Gulfstream G550 z bartavym numaram EW-001PJ «nie maje nijakaha dačynieńnia da prezidenta». Pra heta karespandentu Svabody paviedamiła pres-sakratarka kiraŭnika Biełarusi Natalla Ejsmant.
Pavodle telehram-kanała Nexta, u Łukašenki źjaviŭsia pryvatny biznes-džet Gulfstream G550 z bartavym numaram EW-001PJ. Sa spasyłkaj na krynicy ŭ Nacyjanalnym aeraporcie «Minsk» NEXTA śćviardžaje, što novy samalot upieršyniu prybyŭ u Minsk jašče ŭ druhoj pałovie vieraśnia. Samalot kupiła pryvatnaja aŭstryjskaja kampanija i pierahnała jaho ŭ Minsk.
Svoj pakul adziny rejs hety samalot z kolerami dziaržaŭnaha ściaha zrabiŭ u Varšavu. Košt biznes-samalota, pavodle katałoha, składaje $61,5 młn, piša telehram-kanał.
«Ni asabistych, ni pryvatnych samalotaŭ u prezidenta Biełarusi nikoli nie było, niama i ciapier. I, chutčej za ŭsio, nie budzie — zychodziačy z toj cany, jakuju vy nazvali», — skazała Natalla Ejsmant.
«Što tyčycca dziaržaŭnaha samalota, jakim ciapier karystajecca padčas zamiežnych vizitaŭ kiraŭnik dziaržavy, mahu vas painfarmavać: jon daŭno vypracavaŭ svoj resurs, terminy ekspłuatacyi vyjšli. I siońnia jakraz staić pytańnie, dzie znajści srodki na nabyćcio novaha dziaržaŭnaha samalota. Ale hrošaj na hetyja mety pakul niama, choć i prapanovy ad avijakampanij pastupali.
I, darečy, jašče pra samalot, jaki ciapier vykarystoŭvajecca. Nahadaju, što na momant kupli jon užo byŭ «byłym u ekspłuatacyi». Jaho kuplali ŭ prezidenta Turkmienistana za paŭcany», — skazała Natalla Ejsmant.
U pres-słužbie Nacyjanalnaha aeraporta karespandentu Svabody skazali, što nie majuć infarmacyi pra samalot Gulfstream G550 z bartavym numaram EW-001PJ i paraili źviarnucca ŭ prezidenckuju pres-słužbu.
Na čym lataŭ Łukašenka?
Samalot, jakim karystajecca Łukašenka ŭ zamiežnych pajezdkach, — Voeing 767, kupleny ŭ Turkmienistanie 7 hadoŭ tamu. Jon naležaŭ byłomu prezidentu hetaj krainy Saparmuratu Nijazavu. Hetaj mašynie ŭžo 14 hadoŭ.
A voś viertalotu, jakim dahetul Alaksandr Łukašenka karystaŭsia najčaściej, užo 23 hady — heta viertalot Mi-172 (madernizavany Mi-8AMT) z bartavym numaram EW-002DA. Hety viertalot byŭ admysłova vyrableny na Kazanskim viertalotnym zavodzie (Rasija), 20 hadoŭ tamu jahony košt byŭ kala 4 miljonaŭ dalaraŭ.
Taksama Alaksandr Łukašenka padčas svajho kiravańnia karystaŭsia viertalotam Mi-8 z bartavym numaram EW-001DA i Mi-8 z bartavym numaram EW-25049. Darečy, EW — heta avijacyjny kod Biełarusi.
Da samalota Boeing 767 Alaksandr Łukašenka karystaŭsia bolš ścipłaj madellu — Boeing 737, a jašče raniej — savieckim samalotam Tu-154 u VIP-kampanoŭcy, jaki byŭ kupleny novym u 1995 hodzie. Hety samalot vystaŭlali na prodaž.
