Były pijanierłahier «Arlania» ŭ vioscy Źvianiačy na bierazie Isłačy staŭ miescam razborak pamiž haspadarami rynka «Ždanovičy» i čynoŭnikami. Pakul pieramahaje macniejšy — dziaržava.
U 1990—2000-ja «Ždanovičy» byli adnym z samych prybytkovych biznesaŭ krainy. Hipiermarkiety jašče tolki naradžalisia, i rynak byŭ hałoŭnym miescam zakupaŭ dla dziasiatkaŭ tysiač minčukoŭ, prynosiačy svaim ułaśnikam miljony dalaraŭ. Haspadaryli tut Jaŭhien Šyhałaŭ (pamior u 2014-m) i Michaił Prakapovič (pamior u 2016-m).
U kancy 2000-ch na Šyhałava zaviali kryminalnuju spravu. Uśled navalilisia prablemy sa zdaroŭjem, i jon patrochu pieradaŭ biznes dzieciam, Siarhieju Šyhałavu i Dzijanie Kuryła-Šyhałavaj, a taksama jaje mužu Vitalu Kuryłu.
Anałahična zrabiŭ i jaho partnior Prakapovič — ciapier u liku top-biznesmienaŭ jaho syn Maksim Prakapovič.
Mienavita dzieci apynulisia ŭ centry skandału ź nieruchomaściu.
U 2005 hodzie HD «Ždanovičy» na aŭkcyjonie (inšyja ŭdzielniki aŭkcyjonu nieviadomyja, a ŭzbujnieńnie ziamli adbyłosia zhodna z rasparadžeńniem Alaksandra Łukašenki) atrymaŭ hety pijanierłahier «Arlania» u vioscy Źvianiačy. Kala 13 hiektaraŭ ziamli dastałasia dla «absłuhoŭvańnia bazy adpačynku».
Što adbyvałasia na ziamli, doŭhi čas nie było viadoma. Na ŭjeździe staić budka achovy, terytoryja aharodžanaja płotam, na jakim visić vyvieska z raniejšaj nazvaj bazy adpačynku «Źvianiačy bor» (ciapier jana nazyvajecca «Farelki»).
Nibyta hety płot, jaki pierakryvaje rečku, i staŭ pryčynaj skarhi miascovych žycharoŭ u prakuraturu.
Ciaham raźbiralnictva vyjaviŭsia dziŭny los metavaha ŭčastka.
Vyjaviłasia, u 2012-m jaho častku padzialili pamiž saboj haspadary «Ždanovičaŭ». Jany narezali učastkaŭ pa 25-50 sotak, a Minski rajonny Saviet deputataŭ padmachnuŭ dazvoł.
Za rehistracyju navastvoranych učastkaŭ haspadary zapłacili kadastravy košt — pa $16 tysiač, chacia rynkavaja cana ziamli za 20 kiłamietraŭ ad Minska značna vyšejšaja.
Na skrynšocie pakazana, jak heta vyhladaje: žoŭtym koleram paznačana dziaržaŭnaja ziamla ŭ karystańni HD «Ždanovičy», a ŭnutry jaje — piać pryvatnych učastkaŭ, typ jakich užo pierastaŭ być «pryrodaachoŭnym» i «rekreacyjnym». Na hetaj ziamli vyraśli bahatyja katedžy.
Voś śpis pieršasnych atrymalnikaŭ padzielenaj ziamli — heta ŭsio Prakapovičy i Kuryła-Šyhałavy.
Siońnia tam adzin dom całkam abstalavany dla žyćcia, jon naležyć Dzijanie Kuryła-Šyhałavaj.
Frazu «stvareńnie rekreacyjnaj bazy dla pasłuh nasielnictvu» biźniesmieny zrazumieli svojeasabliva.
Tyja, chto tam realna adpačyvaŭ, kažuć pra najaŭnaść łaźni, tenisnaha korta, haścinicy na 12 numaroŭ. Astatniaje — pryvatnaja ŭłasnaść biznesmienaŭ.
Prakuraturu taki stan rečaŭ aburyŭ, jana pastanaviła pryznać niezakonnymi raniejšyja rašeńni miascovych uładaŭ.
Ciapier u sudach dźvie sprečki. Pieršaja — nakont ziamli, jakaja naležyć HD «Ždanovičy». Jaje mohuć adabrać za niemetavaje vykarystańnie. Sprabujuć adabrać u biznesmienaŭ i pryvatnyja katedžy. Užo adbyłosia niekalki sudoŭ, ale Kuryła i jaho svajaki jašče praciahvajuć ich apratestoŭvać.
Vital Kuryła: My rychtujemsia da padačy apielacyi ŭ Viarchoŭny sud. Pakul jość rašeńnie abłasnoha suda i suda Minskaha rajona, što ŭsie rašeńni vykanaŭčych orhanaŭ z 2011 pa 2016 pryznanyja niezakonnymi. Heta ziamla ŭžo nie naša, ale my jašče pa joj chodzim. Tamu čakajem Viarchoŭnaha suda i spadziajomsia na ćviarozy rozum i spraviadlivaść. Kali adstaim, to budziem vykarystoŭvać jak bazu adpačynku, zdavać u arendu. Tam ža jość tenisnyja korty, łaźni, ludzi tam azdaraŭlivajucca, pravodziać karparatyvy, łoviać rybu.
«Naša Niva»: Ale čamu hetu ziamlu vy padzialili pamiž saboj?
Vital Kuryła: Nu jak jana padzielenaja? Vy niapravilna pahladzieli! Jość rašeńnie vykankama piać učastkaŭ pradać va ŭłasnaść hramadzian, jany tam pabudavali damy, a dzieviać hiektaraŭ — heta baza adpačynku, jakaja znachodzicca ŭ rekreacyjnaj zonie. Aficyjnaja rehistracyja, dazvoł na budaŭnictva — u nas usio jość heta.
Pazicyja Kuryły takaja, što adkaznaść musiać nieści čynoŭniki, jakija niekali dazvolili praviarnuć takuju ŭhodu, a nie jahonaja siamja.
