Toje, što dyrektar Haradziejskaha cukrovaha kambinata Michaił Kryštapovič zatrymany, žychary pasiołka Haradzieja abmiarkoŭvajuć kala kramy: «Tałkovy mužyk, padniaŭ zavod, pry im ludzi stali žyć». Pa słovach miascovych, u subotu na kambinacie byŭ pieratrus, kabiniet kiraŭnika nibyta apiačatany. Krynica Tut.by kaža, što mienavita dyrektara kambinata zdymali z taho samaha samalota, jaki raźviarnuli nad Polščaj i viarnuli ŭ Biełaruś. Ale aficyjnaj infarmacyi pra zatrymańnie Kryštapoviča niama.
Michaił Kryštapovič. Fotazdymak: ctv.by.
— Siońnia vychadny dzień, kambinat staić. Prychodźcie ŭ paniadziełak, — kažuć na centralnaj prachadnoj Haradziejskaha kambinata. Usie pytańni ab mahčymym zatrymańni kiraŭnika Michaiła Kryštapoviča tut abryvajuć: «My hetaha nie viedajem, jon u adpačynku».
Haradzieja — haradski pasiołak u Niaśvižskim rajonie, tut žyvie krychu bolš za 4 tysiačy čałaviek, i mnohija miascovyja žychary pracujuć na cukrovym zavodzie. Choć naviny ŭ Haradziei raźlatajucca chutka, niekatoryja ledź nie adrazu ŭciakajuć, pačuŭšy pytańnie pra Michaiła Vasiljeviča.
— Aby praca była i płacili, nie ŭ kursie ŭsiaho, mnie heta nie treba, — kaža žančyna, jakuju my sustrakajem niedaloka ad zavoda.
Pavodle infarmacyi krynicy TUT.BY, jakaja znajomaja z rodnymi dyrektara, Michaił Kryštapovič znachodziŭsia na borcie taho samaha samalota Minsk-Miunchien, jaki raźviarnuli nad Urocłavam i pasadzili ŭ Hrodnie. Mienavita jon i byŭ źniaty z rejsa. Pra heta kažuć i krynicy pressball.by. Heta ž paćviardžaje adzin z supracoŭnikaŭ cukrovaha kambinata.
— Učora daviedalisia, što Kryštapoviča źniali z samalota. Učora ž pryjazdžali zavod treśli, pieratrus byŭ, jaho kabiniet nibyta apiačatali, — pakul mužčyna raspaviadaje, kala jaho spyniajucca žančyny i dałučajucca da razmovy:
— Ludziam aby palapać! Daj tolki pahavaryć. Kryštapovič padniaŭ zavod. Moža, jon i žyŭ (majecca na ŭvazie dobra — Zaŭvaha TUT.BY), tak i ludzi pry im žyli. Heta tałkovy kiraŭnik, dobry mužyk. Nichto nie viedaje, što tam narabiłasia.
63-hadovy Michaił Kryštapovič uznačalvaje cukrovy kambinat bolš za 20 hadoŭ, usie našy surazmoŭcy havorać pra jaho jak pra tałkovaha dyrektara.
— My ŭ śpisie lidaraŭ pa pradpryjemstvach ŭ SND pa realizacyi praduktaŭ, pry im pačałasia rekanstrukcyja zavoda, — adznačajuć žychary Haradziei. — Jašče zavod mocna padtrymlivaje miascovy futbolny kłub.
— U čaćvier Kryštapovič byŭ na pracy, ja jaho bačyŭ, a ŭ piatnicu palacieŭ u adpačynak, — kaža mužčyna, jaki pracuje na cukrovym zavodzie.
Michaił Vasiljevič razam z žonkaj žyvuć u dvuchpaviarchovym domie ŭ Niaśvižy na cichaj vulicy la voziera. Praz darohu ad jaho — dom plamieńnika. Kali my padjechali, kala katedža stajała zasmučanaja žančyna i niešta raskazvała inšym žančynam. Pačuŭšy naša pytańnie, jana admoviłasia ad kamientaroŭ i źnikła ŭ dvary doma Michaiła Kryštapoviča.
MUS, KDB, Pamiežkamitet pakul što nie prakamientavali incydent z samalotam, u SK nie mohuć «ni paćvierdzić, ni abvierhnuć infarmacyju».
Nahadajem, 24 studzienia, samalot «Biełavija», jaki lacieŭ pa maršrucie Minsk — Miunchien, raźviarnuli na padlocie da Urocłava i pasadzili ŭ Hrodnie.
Jak paviedamlajuć pasažyry hetaha rejsa, z borta źniali ad 6 da 8 čałaviek.
Paśla rejs praciahnuŭ ruch bieź ich.
