Kala 15 čałaviek sabrałasia ŭviečary 22 studzienia, kab spynić budoŭlu i vysiakańnie drevaŭ u Hrušaŭskim skvery ŭ Miensku.
Staršynia Savietu Respubliki Natalla Kačanava — daradca prezydenta pa Miensku — sustrełasia siońnia z žycharami Maskoŭskaha rajonu, jakija pratestujuć suprać budoŭli na terytoryi Hrušaŭskaha skveru, piša Radyjo Svaboda.
«Niečakana adnoj z žycharak patelefanavali z administracyi prezydenta i zaprasili na sustreču z Natallaj Kačanavaj. Taja skazała, što joj pastupiła daručeńnie razabracca ŭ sytuacyi. Jak my zrazumieli, naš videazvarot da Alaksandra Łukašenki dajšoŭ da adrasata», — skazaŭ karespandentu Svabody adzin z čatyroch udzielnikaŭ sustrečy.
Pavodle surazmoŭcy, sustreča była vietlivaja. Žychary pakazali dakumenty, jakija jany majuć, raskazali pra parušeńni, vyjaŭlenyja pierad pačatkam budaŭnictva.
«My paviedamili, što na hety momant niama prajektu detalovaha planavańnia, pašparta na skver, a praces idzie. Vychodzić, što dakumenty jany chočuć zrabić zadniaj dataj. Kačanava skazała, što haradzkija ŭłady nadzielenyja paŭnamoctvami niešta źmianiać. My pieradali dakumenty i budziem peŭny čas čakać reahavańnia», — skazaŭ udzielnik sustrečy.
Natalla Kačanava skazała, što naviedaje Hrušaŭski skver. Tam ciapier prybirajuć terytoryju. Taksama kiraŭnica Savietu Respubliki paabiacała vyvučać sytuacyju i razabracca.
Sustreča z Kačanavaj ciahnułasia kala paŭhadziny, u joj braŭ udzieł taksama pieršy namieśnik staršyni Mienharvykankamu Fiodar Rymašeŭski.
«Kačanava skazała, što chacieła paklikać staršyniu Mienharvykankamu Anatola Sivaka, ale pahutaryła ź im praz telefon. Pakolki Rymašeŭski kuryruje pytańni budaŭnictva i jon byŭ na miescy budoŭli ŭ Hrušaŭskim skvery, to zaprasili jaho», — skazaŭ adzin z abaroncaŭ Hrušaŭskaha skveru.
Vid na budaŭničuju placoŭku z navabudu kala Hrušaŭskaha skveru.
Padčas sustrečy z Kačanavaj havaryli i pra namieśnika kiraŭnika administracyi Maskoŭskaha rajonu Ŭładzimiera Tankieviča, syn jakoha pracuje ŭ firmie-zabudoŭščyku «Datč Star».
«U Kačanavaj reakcyja była dosyć nehatyŭnaja. I kali my skazali, što my z Maskoŭskaha rajonu, to jana skazała prysutnym čynoŭnikam: što ž heta takoje z Maskoŭskim rajonam, što tam za prablemy, kali adtul iduć i iduć ludzi? Vidać, što naviersie pačalisia surjoznyja razborki», — skazaŭ miascovy žychar, udzielnik sustrečy z Kačanavaj.
Abaroncy Hrušaŭskaha skveru spadziajucca, što ŭłady spyniać budoŭlu i skver udasca zachavać.
Siońnia ŭ siaredniaj škole № 3 namieśnik kiraŭnika administracyi Maskoŭskaha rajonu Ŭładzimier Tankievič pryznačyŭ sustreču z žycharami «pa pytańniach raźvićcia terytoryi mikrarajonu «Hrušaŭka»».
Čamu ludzi suprać?
Hrušaŭski skver — pamiž šmatpaviarchovikami kala stancyi metro «Hrušaŭka». Kampanija «Datč Star», pavodle miascovych žycharoŭ, nasupierak prajektu detalovaha planavańnia vyrašyła dabudavać žyły kompleks «Hrand Chaŭs». Novaja budoŭla zakranie častku Hrušaŭskaha skveru.
U videazvarocie da kiraŭnika krainy Alaksandra Łukašenki miascovyja žychary kažuć, što biez abmierkavańnia z žycharami rajonu ŭłady addali ŭčastak skveru dziela «asabistych, karyślivych intaresaŭ».
Dva z pałovaj hady jany źviartalisia ŭ Mienharvykankam, administracyju Maskoŭskaha rajonu, prakuraturu, Ministerstva pryrodnych resursaŭ.
U videazvarocie da Łukašenki jany prosiać zachavać «adziny zialony astravok histaryčnaj Hrušaŭki». Kampaniju «Datč Star» jany zaklikali vykonvać zakony, a nie asabistyja intaresy.
Za apošnija dva hady skver urezali amal na čverć: z 2,16 ha da 1,72 ha.
