Były supracoŭnik Ministerstva adukacyi, kiraŭnik prajekta «Narodny padručnik» Siarhiej Alšeŭski źviarnuŭ uvahu na cikavuju detal — chto źjaŭlajecca pamočnikam deputata Pałaty pradstaŭnikoŭ pa 56-j Niomanskaj akruzie (Lida i Dziatłava)?
Taćciana Avierkava. Fota ok.ru.
Pamočnicaj niadaŭna abranaha deputata Uładzimira Siniaka źjaŭlajecca Taćciana Avierkava. Mała čym admietny fakt, kali b nie adna reč: jana ž była pamočnicaj i ŭ papiaredniaha deputata pa akruzie №56 Valancina Michnieviča.
«Naša Niva» patelefanavała Taćcianie Avierkavaj, kab spytać, jak tak stałasia. Spačatku jana ŭvohule nie zrazumieła pytańnia: «A što tut takoha? Paŭnamoctvy Valancina Michnieviča skončylisia, tamu ja pamočnica va Uładzimira Siniaka».
«Mabyć, Uładzimiru Siniaku spadabałasia, jak ja spraŭlałasia z hetaj pracaj pry inšym deputacie, tamu jon pakinuŭ mianie», — adznačaje spadarynia Avierkava.
Zrešty, i heta nie ŭsie. U 2012 hodzie pamočnikam deputata pa toj žie akruzie Leanida Jermantoviča była… maci Taćciany Avierkavaj, Tamara Šaviel.
A ŭ 2019 hodzie Tamara Šaviel była sakratarom akruhovaj vybarčaj kamisii ŭ 56-j Niomanskaj akruzie, da hetaha jana i ŭznačalvała kamisiju. Voś što pra Tamaru Šaviel pisała ŭ 2016 hodzie dziatłaŭskaja rajonka:
«Pačynajučy z 1994 hoda, jana niaźmienna ŭznačalvaje rajonnuju kamisiju padčas praviadzieńnia vybaraŭ usich uzroŭniaŭ, prajaŭlajučy vydatnyja arhanizatarskija zdolnaści».
Voś tak i vychodzić, što maci prajaŭlaje «vydatnyja arhanizatarskija zdolnaści» padčas vybaraŭ, a dačka stanovicca pamočnicaj užo druhoha zapar pieramožcy.
Pryčym heta nie vałanciorskaja praca, Taćciana Avierkava maje pałovu staŭki na hetaj pasadzie.
Avierkava kaža, što nie bačyć u hetaj situacyi absalutna nijakaha kanfliktu intaresaŭ.
Darečy, asnoŭnaje miesca jaje pracy — nastaŭnica biełaruskaj movy ŭ adnoj sa škoł. Pry hetym razmovu z supracoŭnikam «NN» jana viała padkreślena pa-rusku.
