Jaŭhien Śliž z Hrodna stvaryŭ biaspłatny dadatak Lemantar, ź jakim možna vučyć biełaruskuju movu. Hulnia źjaviłasia, kab pierad škołaj navučyć čytać starejšaha syna Ściapana. Ciapier pavučycca mohuć i inšyja dzieci. Cikavaj jana budzie i darosłym, jakija chočuć padciahnuć biełaruskuju movu ci prosta pabavić čas. Dyzajn hulni raspracavaŭ Illa Kraviec ź Minsku, piša Hrodna.life.
Dadatak źmiaščaje šyroki nabor słovaŭ z paŭsiadzionnaha žyćcia: adzieńnie, ježa, žyviolny i raślinny śviet, cieła čałavieka. Jon dazvalaje daviedacca značeńnie słoŭ na biełaruskaj movie, a taksama ich napisańnie.
— Ideja hulni ŭźnikła letam, za niekalki miesiacaŭ pierad tym, jak starejšy syn Ściapan pajšoŭ u škołu. Naturalna, jana źjaviłasia z patreby navučyć syna čytać, kab jon troški byŭ užo padrychtavany da školnaha žyćcia, — raskazvaje Jaŭhien pra ideju hulni.
Łohika hulni prostaja. Karystalniku pakazvajecca słova i čatyry fotazdymki, adzin ź jakich adpaviadaje dadzienamu słovu. Treba vybrać hety zdymak. Słovy sfarmiravany pa nievialičkich mini-hulniach. Naprykład, jakija zakančajucca na «A» ci ŭ jakich jość dźvie «O» i hetak dalej.
Za kolkaść pravilnych adkazaŭ udzielnik atrymoŭvaje bały-zorački, jakija dazvalajuć pierachodzić na novy ŭzrovień. Kožny ŭzrovień adpaviadaje peŭnaj žyviole i ŭtrymlivaje nievialički padarunak — viadomy biełaruski vyraz, prymaŭku ci prykazku. Taksama jość mahčymaść pahulać u słovy pa peŭnych temach: «Kosmas», «Dom», «Čałaviek» i h.d.
Zaraz u hulni 14 uzroŭniaŭ, ale heta nie ŭzroŭni pa składanaści słovaŭ, a bolš jak indykatar prachodžańnia hulni ŭ cełym.
— Hulnia pierš za ŭsio nakiravana na dzietak, jakija vučacca ci ŭmiejuć čytać. Darosłym jana budzie taksama cikavaj dy karysnaj, asabliva tym, chto adčuvaje patrebu padciahnuć uzrovień svajho słoŭnikavaha zapasu pa biełaruskaj movie. Dy i prosta pabavić čas hulnia dapamoža, — kaža Jaŭhien.
Niekatoryja hrodziency ŭžo pahulalisia ź dzieciami ŭ hulniu i acanili jaje. Voś što jany pišuć u kamientaryjach na Google Play.
«Dobry dapamožnik dla dziaciej pa biełaruskaj. Majoj dačce vielmi spadabałasia. Usiu navahodniuju noč ź siabroŭkaj hulała!»
«Toje, što patrebna našym dzietkam, dziakuj za karysnuju hulniu»
«Dziakuj za dadatak pa vyvučeńni tematyčnaj leksiki pa-biełarusku!»
«Pasprabavała. Mnie spadabałasia hulnia. Karystałasia takoj dla vyvučeńnia polskaj movy. Dobra, što zaraz jość takaja hulnia na biełaruskaj movie! Pasprabujem z Matviejem»
Usie acenki na Google Play — 5,0.
— Bolšaść vodhukaŭ była stanoŭčaja, hulnia spadabałasia dzietkam. Taksama było šmat karysnych zaŭvah pa słovach i malunkach da ich, dy i pamyłki nie zastalisia biez uvahi. Vodhuki nie tolki dazvalajuć palapšać dadatak, ale i dazvalajuć zrazumieć, što praca była zroblena nie darma i nadajuć siłaŭ pracavać dalej, — kaža Jaŭhien.
Jon dadaje, što dadzienaja viersija hulni — tolki pačatak. Jość płany pa palapšeńni funkcyjanała i novych mahčymaściach.
— Z najbližejšaha — zrabić mahčymaść hulać bieź internetu, a taksama dać mahčymaść udzielnikam samastojna dadavać fotazdymki da słovaŭ, kab pavialičyć kolkaść słovaŭ u hulni. Dadatak niekamiercyjny i z adkrytym zychodnym kodam, tamu kožny moža pryniać udzieł u jaho palapšeńni ci napaŭnieńni. Płany jość jašče na niekalki dadatkaŭ, ale z bolšaści jany nakiravany na inšuju aŭdytoryju.
