19 studzienia adbyŭsia čarhovy źjezd partyi «Zialonyja». Heta nie samaja viadomaja partyja, jakaja ŭ realnaści maje niekalki dziasiatkaŭ aktyvistaŭ. Byłaja staršyńka Anastasija (Asia) Darafiejeva nie vyłučałasia ŭ staršyni. U takich umovach novym kiraŭnikom arhanizacyi staŭ 45-hadovy biznesmien Dźmitryj Kučuk.
Jon usiaho na dva hałasy pierahnaŭ ekołaha Irynu Suchij. Za Kučuka prahałasavała 25 delehataŭ, a za Suchij — 23. Zdavałasia b, šarahovaja padzieja ŭ partyjnym žyćci, ale abrańnie Kučuka vyklikała vielmi vostruju reakcyju ŭ adnaho sa stvaralnikaŭ kampanii «Śviežy viecier» Uładzimira Mackieviča.
U svaim fejsbuku Uładzimir Mackievič užo napisaŭ niekalki dopisaŭ, dzie źniščalna krytykuje Kučuka i vybar partyi. «NN» spytałasia ŭ abodvuch bakoŭ, što stała pryčynaj hetaha kanfliktu?
Uładzimir Mackievič. Fota Radyjo «Racyja».
«Dy nie, mianie nie bambić. Ja jašče ŭ śniežni pisaŭ pra Juščuka ź Vilejki, jaki vyłučyŭsia ŭ prezidenty, pisaŭ pra Volhu Kavalkovu, pisaŭ pra Alenu Anisim, bo, viedajecie, nad krainaj visić pahroza straty niezaležnaści i źmieny Kanstytucyi, što pryviadzie jašče da bolšaj dyktatury, kali my nie parupimsia», — pačynaje Uładzimir Mackievič.
«Čarhovyja vybary ź viadomym vynikam, ź viadomym machlarstvam adciahvajuć uvahu ad hałoŭnych pahrozaŭ. Ja napisaŭ nievialiki «Manifiest-2020», dzie siarod inšaha paznačana pra mobinh, bulinh i trolinh tych, chto praz svoj ehaizm, biazhłuzdaść ci vuzkakarparatyŭnyja intaresy nie zvažaje na tyja pahrozy, jakija stajać pierad krainaj. I nibyta tyja prusaki lezuć udzielničać u vybarach. Jany vykonvajuć absalutna abstraktnuju, adarvanuju ad žyćcia paviestku, i ličać heta palitykaj.
Mienavita tamu ŭ majoj prahramie i paznačana pra mobinh i trolinh hetych mizierablaŭ [biezdapamožnaja, niaščasnaja istota — Red.]. Toje, što jany robiać, — heta zdrada nacyjanalnym intaresam, na jakija siońnia ŭ čarhovy raz zamachvajecca režym. Sami pa sabie asoby Kučuka, Juščuka ci Čeračania mianie nie cikaviać. Heta drobnyja soški, i partyi ŭ ich nie ŭpłyvovyja. Mnie cikava, kab ludzi ŭ «Śviežym vietry», vałanciory, chto ŭvohule čytaje i cikavicca palitykaj, vypracavali svajo staŭleńnie da peŭnych asob, jakija praz svaje ehaistyčnyja intaresy hańbiać nacyjalnyja.
A sam Kučuk? Nu kudy jon lezie? Heta prosta śmiešna. Kali my pahladzim na ŭpłyvovych i niečaha vartych ludziej, jakija raniej udzielničali ŭ prezidenckich vybarach — Hančaryk, Milinkievič, Niaklajeŭ, — to pabačym, što ciapierašnija nie daciahvajuć navat da raniejšaha ŭzroŭniu», — skazaŭ Uładzimir Mackievič.
Lidar BSDP «Hramada» Ihar Barysaŭ u svaim fejsbuku vykazaŭ zdahadku, što Mackievič moža być zasmučany praz toje, što staršynioj partyi nie abranaja Iryna Suchij, jakaja ŭvachodzić u Kaardynacyjny kamitet Nacyjanalnaj płatformy Forumu hramadzianskaj supolnaści i źjaŭlajecca «ekśpiertkaj pa pytańniach ustojlivaj enierhietyki i implemientacyi Orchuskaj kanviencyi ŭ Biełarusi». Da hetaj płatformy maje dačynieńnie i sam Mackievič.
«Ja nie siabra partyi «Zialonyja». Ja ŭvohule kazaŭ, što hetyja drobnyja partyi, ci, chutčej, hurtki pa intaresach, pavinny być raspuščanyja. Bo jany praz svaje drobnyja karparatyŭnyja intaresy zaminajuć abjadnańniu zdarovych siłaŭ u apazicyi. Ja trošku pracavaŭ ź niekatorymi aktyvistami partyi «Zialonyja». Jany ŭdzielničali ŭ mianie ŭ sieminary. Heta i Asia Darafiejeva [byłaja kiraŭnica partyi — Red.] i Iryna Suchij, jany viedajuć maje prapanovy, dobra da ich staviacca, ale ja nie ŭmiešvajusia ŭ ich spravy», — adznačaje Uładzimir Mackievič.
Sam Dźmitryj Kučuk hetak kamientuje pavyšanuju ŭvahu da jaho asoby z boku Mackieviča:
Dźmitryj Kučuk. Fota greenbelarus.info.
«Ja starajusia nie źviartać uvahu, što kaža Uładzimir Mackievič. Sprava ŭ tym, što ja nie zaŭsiody razumieju jahonyja fiłasofskija idei i toje, što jon kaža. Asabista ź im u nas dastatkova narmalnyja adnosiny.
Ja b chacieŭ, kab Uładzimir Mackievič skiravaŭ usiu tuju enierhiju, usie tyja słovy, jakija jon piša ŭ fejsbuku, nie na apazicyju, a na ŭłady, na prezidenta, na premjera, na hienieralnaha prakurora. Intelihientny čałaviek nie budzie siabie pavodzić tak, jak heta robić Uładzimir Mackievič, bo słabych nie bjuć», — adznačaje Kučuk.
Lidar partyi «Zialonyja» havoryć, što arhanizacyja vyrašyła iści nie pa tym šlachu, što prapanuje Mackievič. «My vyrašyli raźvivacca pa-inšamu, rabić bolšy ŭchił na palityku, na rehijanalnyja struktury.
Mnie zdajecca, što možna pa-roznamu dabivacca taho, kab u Biełarusi byli sumlennyja i spraviadlivyja vybary. Možna pa-fiłasofsku razvažać, što vybaraŭ niama, a možna zmahacca za toje, kab jany byli. Partyi pavinny vyłučać kandydataŭ, zajmacca nazirańniem, zmahacca za hetyja vybary, a nie prosta razvažać».
Uładzimir Mackievič adkazvaje nastupnym čynam: «A chiba ja mała krytykuju ŭłady? Navošta kazać banalnyja rečy? Usio ŭžo daŭno napisana. Kali spadar Kučuk pračytaje moj list na imia Alaksandra Łukašenki, jaki napisany jašče ŭ krasaviku, to chaj sabie skaža, chto bolš za mianie vykryvaŭ sutnaść hetaha režymu? Siońnia ŭžo tolki lanivy nie krytykuje ŭładu. Ale možna heta rabić prosta słovami, a možna kankretnymi dziejańniami.
Dyk voś, dla kankretnych dziejańniaŭ treba pakinuć ubaku svaje ehaistyčnyja i karparatyŭnyja intaresy: arenda na ofis partyi, hrošy na sajt, raskrucicca padčas vybaraŭ. I voś hetyja ehaistyčnyja intaresy jany staviać vyšej za baraćbu. Vo prablema: skazać, što Łukašenka — dyktatar, što jon pradaje nacyjanalnyja intaresy, ale chto hetaha nie viedaje?
Mianie ž kłapocić pytańnie: a što rabić? Siońnia ŭdzieł u vybarach — heta padtrymka ŭłady, što b mnie ni kazali. Davajcie ŭspomnim 2006 hod i Alaksandra Kazulina, jaki nie byŭ zaŭvažany ŭ apazicyi ni da taho, ni paśla taho, ale jakija jon słovy kazaŭ suprać Łukašenki, jołki-pałki! Na spravie ž jon tolki źmienšyŭ padtrymku Milinkieviča. Zamiest adzinaha byŭ taki razdraj. Treba pa spravach mierkavać, a nie pa słovach».
