Biełaruskija transpłantołahi vyratavali dvuchhadovuju dziaŭčynku ź piačonačnaj niedastatkovaściu ciažkaj stupieni, paviedamiŭ BiełTA namieśnik dyrektara pa chirurhičnaj rabocie Minskaha NPC chirurhii, transpłantałohii i hiematałohii doktar miedycynskich navuk, dacent Alaksiej Ščerba.
Apieracyja, jakaja ličycca adnoj z samych składanych u chirurhii i transpłantacyi piečani, była praviedziena za miesiac da novaha 2020 hoda. Technałohija zaviecca split-transpłantacyjaj, kali trupnuju piečań darosłaha donara dzielać na dźvie žyćciazdolnyja častki, vialikaja ź jakich (pravaja dola) vykarystoŭvajecca dla darosłaha recypijenta, a mienšaja (levaja dola) — dla dziciaci. U apieracyjnaj znachodziacca adrazu try bryhady chirurhaŭ i dźvie aniestezijołahaŭ.
Darosły recypijent, jakomu dastałasia pravaja dola piečani, chutka pajšoŭ na papraŭku i nieŭzabavie paśla apieracyi jaho vypisali. A dziciaci, jakoje znachodziłasia ŭ vielmi ciažkim stanie, spatrebiłasia bolš času.
Bolš za miesiac kalektyŭ aniestezijołahaŭ-reanimatołahaŭ i chirurhaŭ-transpłantołahaŭ pieraadolvaŭ nastupstvy ciažkaj piačonačnaj niedastatkovaści.
— Treba było pryniać mnostva pravilnych rašeńniaŭ, kab u vyniku stan maleńkaj pacyjentki palepšyŭsia. Jaje ŭžo pieraviali ŭ dziciačuju infiekcyjnuju balnicu Minska, — raspavioŭ Alaksiej Ščerba.
U 2019 hodzie byli praviedzieny dźvie split-transpłantacyi. Pieršaja prajšła ŭ ekstremalnych umovach: pryjšłosia ŭ ścisnutyja terminy ratavać siamju paśla atručvańnia blednaj pahankaj.
Tady za adnu noč zrabili pierasadku piečani i maci, i dziciaci. Na ščaście, była mahčymaść znajści donara z prydatnym orhanam. Ciapier ža dvuchhadovaj pacyjentcy apieracyju praviali ŭ płanavym režymie. Ciaham niekalkich miesiacaŭ jana čakała transpłantat, prydatny pa hrupie kryvi, uzroście, jakaści.
