Słužba nacyjanalnaj biaśpieki (SNB) Armenii paviedamiła, što zatrymała čałavieka, jaki napisaŭ u sacyjalnych sietkach, byccam premjer-ministar krainy Nikoł Pašynian pavinšavaŭ prezydenta ZŠA Donalda Trampa ŭ suviazi sa śmierciu iranskaha hienerała Kasema Sulejmani, pieradaje Radyjo Svaboda.
Dopis byŭ apublikavany 3 studzienia na staroncy karystalnika ŭ Facebook pad imieniem «Dyjana Aruciunian». «Hetaja chłuślivaja infarmacyja z dopisu atrymała raspaŭsiudžańnie ŭ azerbajdžanskich i iranskich ŚMI», — havorycca ŭ zajavie ŭ SNB Armenii.
Videa zatrymańnia apublikavali. Zatrymany raspaŭsiudžvaŭ infarmacyju, jakaja nanosiła škodu «dziaržavie, hramadzkaści i asobie i była skiravanaja na raspalvańnie mižnacyjanalnaj, mižrasavaj i mižrelihijnaj roźni», — zajavili ŭ SNB.
Na videa zatrymany pryznajecca, što akaŭnt naležyć mienavita jamu. Suprać jaho zaviali kryminalnuju spravu pavodle artykułu pra paklop. Jamu pahražaje štraf da 200 minimalnych akładaŭ, albo papraŭčyja raboty na termin da dvuch hadoŭ, albo aryšt na dva miesiacy.
Iranski hienerał Kasem Sulejmani, jaki kamandavaŭ specnazam u składzie Korpusa vartavych isłamskaj revalucyi, byŭ zabity ŭdaram z drona ŭ rajonie bahdadzkaha aeraportu 3 studzienia. Udar byŭ naniesieny pa rasparadžeńni prezydenta ZŠA Donalda Trampa. U Pentahonie zajavili, što hienerał raspracoŭvaŭ plany napadu na amerykanskich dyplamataŭ i vajskoŭcaŭ u Iraku.
Zabojstva vysokapastaŭlenaha vajskoŭca abvastryła sytuacyju ŭ rehijonie. Parlament Iraka zapatrabavaŭ vyvieści z krainy zamiežnyja vojski, Iran zajaviŭ pra faktyčnuju razmarozku vajennaj jadziernaj prahramy, prezydent Irana nazvaŭ ataku «terarystyčnym aktam» i paabiacaŭ, što «Ameryka doraha za jaho zapłacić».
Jerevan padtrymlivaje ciesnyja suviazi i z ZŠA, i ź Iranam, tamu sam Pašynian na svajoj aficyjnaj staroncy ŭ sacsietkach admaŭlaŭ, što vinšavaŭ Trampa z zabojstvam Sulejmani, i zaklikaŭ ZŠA i Iran da «strymanaści».
