Siońnia sud Zavodskaha rajona vynies prysud byłomu hienieralnamu dyrektaru minskaj kampanii-zabudoŭščyka «Tambaz» Lvu Chajucinu, jaki abvinavačvaŭsia ŭ słužbovaj niadbajnaści i złoŭžyvańni ŭładaj. Jon pryhavorany da šaści hadoŭ źniavoleńnia ŭ kałonii ŭzmocnienaha režymu. «Tambaz» nie zmoh dabudavać ŽK «Arkadzija» niahledziačy na toje, što dolščyki apłacili svaje kvatery, piša Tut.by.
Staličny zabudoŭščyk «Tambaz» až da leta 2017 hoda mieŭ biezdakornuju šmathadovuju reputacyju. Ale kali spyniłasia budaŭnictva dvuch žyłych damoŭ u kompleksie «Arkadzija», trymalniki ablihacyj zabili tryvohu. Zabudoŭščyk niekalki razoŭ abiacaŭ adnavić budaŭnictva, ale hetaha nie zdaryłasia. Uładalniki niedabudavanych kvater zapisali niekalki videa-zvarotaŭ da Łukašenki, a taksama napisali va ŭsie instancyi z patrabavańniem pravieryć «Tambaz».
Vynikam pravierki i stała zaviadzieńnie kryminalnaj spravy ŭ dačynieńni da Lva Chajucina, a taksama źmiaščeńnie jaho pad vartu ŭ śniežni 2017 hoda. Jaho abvinavacili pa art. 428 (Słužbovaja niadbajnaść) i č. 3 art. 424 (Złoŭžyvańnie ŭładaj abo słužbovymi paŭnamoctvami) KK Biełarusi.
U chodzie śledstva było ŭstanoŭlena, što ŭ pieryjad kiraŭnictva «Tambazam» Chajucinym i pa jaho ŭkazańni bolš za 21 miljon biełaruskich rubloŭ byli vydatkavanyja na zakančeńnie budaŭnictva abjektaŭ 3-ci čarhi (dva žyłyja damy, administracyjna-handlovyja pamiaškańni 3-ci čarhi) i biahučuju haspadarčuju dziejnaść «Tambaza», a pazastałyja hrošy — bolš za 42 miljony rubloŭ — na budaŭnictva abjektaŭ 2-j i 4-j čarhi, uźviadzieńnie jakich nie zavieršana ŭ suviazi z adsutnaściu ŭ kampanii srodkaŭ i krynic finansavańnia.
U vyniku nazvanych dziejańniaŭ Chajucina STAA «Tambaz» nie vykanała pryniatyja na siabie abaviazacielstvy pa budaŭnictvie i vydzialeńni 639 kvater i dvuch mašyna-miescaŭ 615 ułaśnikam žyllovych ablihacyj (606 hramadzian i 9 subjektaŭ haspadarańnia).
Ahulnaja škoda, pryčynienaja «Tambazam», skłała bolš za miljon rubloŭ.
U chodzie śledstva paciarpiełymi byli pryznanyja 606 čałaviek (trymalniki žyllovych ablihacyj, jakija całkam apłacili svaje kvatery ŭ ŽK «Arkadzija») i 9 subjektaŭ haspadarańnia.
Padčas sudovych pasiadžeńniaŭ Leŭ Chajucin patłumačyŭ, što pieraškodziła dabudavać damy: spynieńnie budaŭnictva i, jak śledstva, abhruntavanyja chvalavańni dolščykaŭ, a śledam - šmatlikija pravierki, jakija paciahnuli za saboj kryminalnuju spravu.
U svaim apošnim słovie Leŭ Chajucin zajaviŭ, što nie ličyć siabie vinavatym. Hetak ža jon padkreśliŭ, što kali b nie pravierki, to da 2020 hoda ŭsie damy byli b dabudavanyja, i hramadzianie by ničoha nie dapłačvali.
