Čarhovuju akcyju pratestu suprać intehracyi z Rasijaj pravodziać u Minsku 29 śniežnia. Častka arhanizataraŭ ciapier adbyvaje administracyjny aryšt.
Sustaršynia Biełaruskaj chryścijanskaj demakratyi Pavieł Sieviaryniec zaklikaŭ sabracca ŭ niadzielu, 29 śniežnia, a 12-j na Kastryčnickaj płoščy i prajścisia šeściem pa praśpiekcie da stancyi mietro «Maskoŭskaja» i viarnucca nazad.
Sam Sieviaryniec, jaki zaklikaŭ na hetuju akcyju, ciapier za kratami.
Ahułam «na sutkach» za akcyi suprać intehracyi 7, 8, 20 i 21 śniežnia 6 apazicyjanieraŭ.
U svaju čarhu arhkamitet «Kampanii ŭ abaronu niezaležnaści» prapanavaŭ usim achvotnym zamiest šeścia ŭstać u «žyvy łancuh».
Udzielnikaŭ siońnia mała. Na Kastryčnickaj płoščy sabralisia kala 100 čałaviek. Jeść niekalki bieł-čyrvona-biełych ściahoŭ. Z palitykaŭ prysutnyja Volha Kavalkova, Viačasłaŭ Siŭčyk, Mikałaj Kazłoŭ.
Ludzi prosta stajać: chto pryjšoŭ adzin — toj adzin i staić, chto sa znajomymi — hurtkami.
Udzielniki prynieśli fotazdymki tych, kaho pasadzili na sutki za ŭdzieł u akcyjach suprać intehracyi, i zapatrabavali ich vyzvaleńnia.
Pierad prysutnymi vystupili usie achvotnyja ŭ farmacie «adkrytaha mikrafona».
Paźniej udzielniki akcyi pajšli karotkim šeściem uzdoŭž praśpiekta Niezaležnaści ŭ bok płoščy Niezaležnaści. Viačasłaŭ Siŭčyk vyhukvaje imiony źniavolenych palitykaŭ i razam z pratestoŭcami patrabuje im svabody. Kałona hukaje «Žyvie Biełaruś» i «Dałučajsia».