Da Novaha 2020 hoda Biełaruskaja asacyjacyja sacyjalnych rabotnikaŭ pry padtrymcy kampanii A1 vypuściła mastacki kalandar «Dobryja žarty». Jon składajecca z admysłovych malunkaŭ, jakija ilustrujuć 13 biełaruskich prykazak, adabranych z 8000 varyjantaŭ! U raspracoŭcy kalendara brali ŭdzieł ludzi ź niaprostym losam — naviedvalniki centra reabilitacyi Minskaha kłubnaha doma «Adkrytaja duša». Prezientacyja vydańnia adbyłasia 18 śniežnia pry ŭdziele lidara etna-trya «Troica» Ivana Kirčuka.
Kab padrychtavać kalandar «Dobryja žarty», śpiecyjalisty Minskaha kłubnaha doma «Adkrytaja duša» razam z naviedvalnikami centra pračytali kala vaśmi tysiač biełaruskich prykazak, asensavali ich dy abrali niekalki dziasiatkaŭ najbolš cikavych, paśla čaho ŭžo prapanavali svaje idei biełaruskaj mastačcy Taćcianie Byc. «Byŭ by sad, a sałaŭi prylaciać», «Haspadarku vieści — nie baradoj treści», «Aby boh da dobry ludzi, to ŭsio dobra budzie» — kožny miesiac u kalendary pačynajecca z padobnaha pasłańnia.
Minski kłubny dom «Adkrytaja duša» — prajekt Biełaruskaj asacyjacyi sacyjalnych rabotnikaŭ pa padtrymcy ludziej ź psichičnymi rasstrojstvami. U tych, chto tudy prychodzić, roznyja žyćciovyja historyi, ale ich jadnajuć adnolkavyja žadańni pieraadoleć nastupstvy chvarob, navučycca čamuści kaštoŭnamu i znajści siabroŭ. Usia rabota ŭ centry arhanizavana tak, kab udzielniki reabilitacyjnaj prahramy viarnuli sabie adčuvańnie ŭłasnaj značnaści i ŭpeŭnienaść u svaich siłach, adčuli padtrymku i atrymali mahčymaść uzajemadziejničać razam ź inšymi ludźmi.
Kalandar nie pastupić u prodaž i budzie raspaŭsiudžvacca praź Minski kłubny dom «Adkrytaja duša». Padtrymać jaho naviedvalnikaŭ i śpiecyjalistaŭ možna, akazaŭšy vałanciorskuju ci sponsarskuju dapamohu.
Za bolš padrabiaznaj infarmacyjaj źviartajciesia siudy ci telefanujcie +375 (29) 138-64-78 (Kaciaryna). Kansultacyi pa ŭdziele ŭ prahramach reabilitacyi pa numarach: +375 (44) 779-88-24 i +375 (17) 235-04-48.
