Pieravahi technałohii 3D-druku acanili homielskija śpiecyjalisty, paviedamlaje newsgomel.by.
Ź ciažkimi traŭmami pazvanočnika ŭ niejrachirurhičnym adździaleńni № 2 homielskaj abłasnoj kliničnaj balnicy pracujuć užo nie pieršy hod.
Na minułym tydni ŭ adździaleńnie śpinalnaj chirurhii pastupiŭ pacyjent piensijonnaha ŭzrostu. Prykładna hadoŭ dziesiać tamu ŭ jaho była surjoznaja traŭma šyjnaha adździeła chrybietnika: pierałom druhoha šyjnaha pazvanka.
Mužčyna pieražyŭ heta, praciahvaŭ pracavać, ale pierałom tak i nie zrośsia. Z časam uźnikła defarmacyja, jakaja pryviała da zvužeńnia chrybietnaha kanała i ściskańnia śpinnoha mozhu.
A potym u adzin momant nastała mocnaje paharšeńnie. Za niekalki dzion da apieracyi mužčyna ŭžo nie moh ni chadzić, ni ruchać rukami.
Kab adnavić funkcyjanalnaść kaniečnaściaŭ, patrabavałasia apieracyja pa pašyreńni chrybietnaha kanała. Situacyja dla homielskich śpiecyjalistaŭ nie novaja, u balnicy i raniej pravodzilisia padobnyja chirurhičnyja ŭmiašańni, ale hałoŭnaja składanaść hetaha vypadku ŭ tym, što paškodžanaje miesca — pierachod hałaŭnoha mozhu ŭ śpinny.
Tut raźmiaščajecca vialikaja kolkaść žyćciova važnych centraŭ i struktur. Ich paškodžańnie moža pryvieści da śmierci chvoraha.
Na ščaście, sučasnyja technałohii značna palahčajuć zadaču, pastaŭlenuju pierad niejrachirurhami. Praktyka 3D-pryntynhu orhanaŭ šyroka raspaŭsiudžana va ŭsim śviecie. Hamielčuki stali pieršymi, chto zrabiŭ heta z chrybietnikam.
Užo praz tydzień paśla apieracyi lekary adznačajuć značny prahres: mužčyna znoŭ pačaŭ chadzić, samastojna siabie absłuhoŭvać.
