mlyn.by
Dniom 1 śniežnia ŭ domie šmatdzietnaj siamji ŭ vioscy Błoń zdaryŭsia pažar. U vyniku zdareńnia zahinuła 34-hadovaja haspadynia i jaje švahier. Dźvie dziaŭčynki 11 i 13 hadoŭ atrymali apioki, piša Tut.by.
Samomu starejšamu ŭ siamji 13 hadoŭ, małodšamu — hod i try miesiacy. Paśla pažaru čaćviora apynulisia ŭ Puchavickim rajonnym sacyjalna-piedahahičnym centry, traich ź niaznačnymi traŭmami špitalizavali ŭ miascovuju balnicu.
— Siońnia my ich zabiarem i taksama pieradamo ŭ prytułak, - raspaviadaje Alena Šastakova, namieśnik načalnika ŭpraŭleńnia pa adukacyi, sportu i turyzmu Puchavickaha rajvykankama. — Jašče dźvie dziaŭčynki znachodziacca ŭ Minsku ŭ apiokavym centry. Tudy nikoha nie puskajuć. Usio, što treba im dla lačeńnia, my pieradali.
Padčas pažaru ŭ dziaciej zhareła ŭsio. Ale dziakujučy spahadlivaści ludziej, ciapier, kaža Alena Šastakova, u chłopčykaŭ i dziaŭčynak jość usie nieabchodnyja rečy.
— Im kupili i abutak, i vopratku pa siezonie. Dziaŭčynkam navat futry pieradali, — praciahvaje surazmoŭca. — Kali jany byli ŭ balnicy, šmat rečaŭ prynieśli tudy, zaraz niasuć u škołu.
Byli tyja, chto vyrašyŭ dapamahčy dzietkam hrašyma. Za hetyja srodki bratam i siastryčkam kupili zaplečniki i kancylarskija prynaležnaści.
Pra siamju susiedzi kažuć - zvyčajnaja. Mama, raspaviadajuć, za dziećmi hladzieła. Tata — u turmie. Rodnyja baćki žyvuć u Bychaŭskim rajonie. Ź blizkich u Puchavickim rajonie — baćki mamy. Babula pracuje ŭ stałovaj.
Dla pražyvańnia ŭnukaŭ dom dziaduli i babuli nie padychodzić, tamu dzieciam užo znajšli dvuchpaviarchovy katedž u «SOS - Dziciačaj vioscy» ŭ Marjinaj Horcy. Vychoŭvać ich budzie piedahoh.
— Katedž znachodzicca prykładna ŭ dvuch kiłamietrach ad ahraharadka, dzie žyvuć babula i dziadula, - kaža Alena Šastakova. - U luby momant rodnyja zmohuć da ich pryjazdžać, naviedvać dziaciej i dapamahać vychavalniku.
Ciapier ź dziećmi pracujuć psichołahi.
Što stała pryčynaj pažaru pakul vyśviatlajecca. Adna ź viersij — nieaściarožnaje abychodžańnie z ahniom pry raspalvańni piečy.
