Brescki abłasny sud 10 śniežnia abviaściŭ prysud pa kryminalnaj spravie ab žorstkim zabojstvie ciažarnaj žančyny.
Pjany mužčyna, raniej sudzimy, 7 žniŭnia skraŭ sa składa kramy ŭ vioscy Juchnavičy pradukty i inšyja materyjalnyja kaštoŭnaści na sumu kala 335 rubloŭ. Uviečary taho ž dnia, ale ŭžo ŭ vioscy Piatrovičy, jon pasvaryŭsia ź ciažarnaj žančynaj. Mužčyna viedaŭ, što jana čakaje dzicia, ale nanios budučaj maci vialikuju kolkaść udaraŭ rukami i nahami, a taksama nažom pa roznych častkach cieła. Ad atrymanych traŭmaŭ žančyna pamierła na miescy zdareńnia.
Mužčynu pryznali vinavatym u zabojstvie zaviedama ciažarnaj žančyny, ździejśnienym z asablivaj žorstkaściu i paŭtornym kradziažy. Jaho prysudzili da 22 hadoŭ pazbaŭleńnia voli z adbyvańniem pakarańnia ŭ papraŭčaj kałonii va ŭmovach strohaha režymu.
