10 śniežnia — Dzień pravoŭ čałavieka. U hety dzień na płoščy Jakuba Kołasa inicyjatyva «Maršyruj, dzietka» zładziła «art-interviencyju» suprać chatniaha hvałtu nad žančynami, piša Radyjo Svaboda.
Na płoščy Jakuba Kołasa aktyvistki rasstavili 36 par abutku, jaki jany sabrali za dzień praz supołku ŭ Facebook. Akcyja pryśviečanaja hłabalnaj kampanii suprać chatniaha hvałtu ŭ dačynieńni žančyn i dziaŭčatak.
Sioleta łozunh kampanii — «Rasfarbuj śviet u aranžavy koler. Pakaleńnie roŭnaści vystupaje suprać zhvałtavańniaŭ». Tamu vałanciorki pafarbavali abutak u aranžavy.
Tufli simvalizujuć achviar, paciarpiełych ad chatniaha hvałtu. Sioleta ad chatniaha hvałtu ŭ Biełarusi zahinuli 55 čałaviek.
«U nas dahetul niama zakonu ab chatnim hvałcie. A hetyja žančyny i dzieci apynulisia ŭ takich situacyjach. My vybrali abutak dla art-instalacyi, bo jon krasamoŭna havoryć pra ludziej, jakich bolš niama», — kaža adna z kaardyntarak inicyjatyvy Maryna Korž.
Takija akcyi ŭžo prachodzili ŭ Stambule, Rymie, Jerevanie.
Raniej ułady zabaranili pikiety suprać chatniaha hvałtu ŭ Minsku. Pikiety płanavali pravieści 9 i 10 śniežnia ŭ Kijeŭskim skviery ŭ miežach kampanii «16 dzion aktyŭnych dziejańniaŭ suprać hiendarnaha hvałtu».