Prezident Ukrainy Uładzimir Zialenski paćvierdziŭ, što ŭ jaho zapłanavana sustreča z prezidentam RF Uładzimiram Pucinym u ramkach pierahavoraŭ «narmandskaj čaćviorki», i što jon čakaje kankretnych vynikaŭ ad hetaj sustrečy. Pra heta ŭkrainski prezident zajaviŭ u efiry telekanała «Ukraina».
«Tak, usie dvuchbakovyja sustrečy buduć va ŭsich prezidentaŭ», - skazaŭ jon, adkazvajučy na pytańnie ab tym, ci buduć dvuchbakovyja pieramovy prezidentaŭ Ukrainy i RF. Zialenski zajaviŭ, što «choča viarnucca z kankretnymi vynikami» z Paryža i pryvieźci va Ukrainu «razumieńnie i adčuvańnie taho, što ŭsie (pieramoŭščyki) chočuć pastupova zaviaršyć hetuju trahičnuju vajnu».
«Adzinaje, z-za čaho ja niervujusia - ja vielmi nie lublu biezvynikovaści pieramoŭ. Heta adzinaje, čaho ja bajusia», - skazaŭ jon, adkazvajučy na pytańnie, ci adčuvaje niejki strach pierad hetaj sustrečaj.
Zialenski zajaviŭ, što bačyć nastroj na dyjałoh z boku RF, što paćviardžajecca raniejšym uzajemnym abmienam pałonnymi, a taksama viartańniem va Ukrainu karabloŭ, zatrymanych RF.
U pieršuju čarhu Zialenski źviarnuŭ uvahu na pytańni viartańnia ŭsich pałonnych i spynieńnia ahniu na Danbasie.
Jon pryznaŭ, što «ŭsiaho damahčysia nie atrymajecca» na sustrečy ŭ Paryžy, nazvaŭšy «pieramohaj» sam fakt taho, što hetyja pieramovy adbuducca.
Zialenski adznačyŭ, što jon maje ŭłasnaje bačańnie paśladoŭnaści vykanańnia punktaŭ minskich pahadnieńniaŭ, ale nie chacieŭ by kazać pra padrabiaznaści, kab nie sarvać samit «narmandskaj čaćviorki» ŭ Paryžy 9 śniežnia.
Zialenski padkreśliŭ, što budzie uźniata i pytańnie i ab viartańni kantrolu za dziaržaŭnaj miažoj Ukrainy.
