U Niamieččynie viadziecca raśśledavańnie suprać mierkavanych supracoŭnikaŭ rasiejskaj vajskovaj vyviedki — Hałoŭnaha ŭpraŭleńnia Hienštabu Rasiei, viadomaha jak HRU, — jakich u Vialikabrytanii padazrajuć u atručeńni padvojnaha ahienta Siarhieja Skrypala i jaho dački Julii ŭ Sołsbery. Pra heta paviedamlaje radyjo «Svaboda» sa spasyłkaj na Der Spiegel.
Pavodle dadzienych vydańnia, raśśledavańnie viadzie hieneralnaja prakuratura Niamieččyny i federalnaja kryminalnaja palicyja. Jano adkrytaje ŭ suviazi z tym, što rasiejskija hramadzianie, jakija ŭ spravie ab atručeńni Skrypaloŭ fihurujuć pad imionami Rusłan Bašyraŭ i Alaksandar Piatroŭ, u 2014 hodzie praviali try dni ŭ Niamieččynie, u rajonie Frankfurtu-na-Majnie.
Akramia taho, žurnalisty Spiegel i raśślednaj hrupy Bellingcat miarkujuć, što ŭ Niamieččynie byli kantakty ŭ kamandzira rasiejskaj vajskovaj častki 29155, mierkavanaha kiraŭnika «Bašyrava» i «Piatrova». Havorka idzie pra hienerał-majora Andreja Aviarjanava.
Spiegel nahadvaje pra raśśledavańnie zabojstva hramadzianina Hruzii Zelimchana Chanhašvili, zastrelenaha letam sioleta ŭ Berlinie. 3 śniežnia Bellingcat i ich partnery paviedamili, što, pavodle ich dadzienych, Chanhašvili zastreliŭ rasiejski hramadzianin Vadzim Krasikaŭ, jaki pryjechaŭ u Niamieččynu z pašpartam na čužoje imia. U piatnicu ŭ novym raśśledavańni Bellingcat śćviardžajecca, što jon moh słužyć u specnazie FSB «Vympieł». Niamieckija ŭłady raniej abvinavacili Maskvu ŭ niedastatkovym supracoŭnictvie sa śledztvam u spravie ab zabojstvie Chanhašvili.
Siarhiej i Julija Skrypali byli atručanyja ŭ sakaviku 2018 hodu rečyvam «Navičok». Jany vyžyli paśla doŭhaha lačeńnia. Śledztva ŭ Brytanii padazraje ŭ atručeńni rasiejskich hramadzian, jakija pryjechali ŭ krainu pa pašpartach na imiony Bašyrava i Piatrova. Bellingcat i ich partnery ŭ raśśledavańniach śćviardžajuć, što za hetymi imionami chavajucca aficery HRU — Anatol Čapiha i Alaksandar Miškin. «Bašyraŭ» i «Piatroŭ» vosieńniu letaś davali interviju telekanału RT, u jakim admaŭlali dačynieńnie da zamachu na Skrypaloŭ. Z tych časoŭ jany nie źjaŭlalisia na publicy.
