Baćki vučniaŭ šostaj škoły Połacka paśla baćkoŭskaha schodu aburylisia:
«Dyrektarka Ludmiła Viktaraŭna padčas schodu paprasiła zdać hrošy, kab dakupić jašče 25 par łyžaŭ», — raskazaŭ «Našaj Nivie» baćka adnaho z vučniaŭ Ihar Zabaroŭski.
Mužčyna z hetym pytańniem źviarnuŭsia ŭ haradski adździeł adukacyi, dzie jamu adkazali, što takoha być paprostu nie mahło. Toje ž samaje śćviardžaje i dyrektarka škoły Ludmiła Haviaza.
Ludmiła Haviaza, fota pvestnik.by.
«Nu jak možna pracavać z takimi baćkami? Jany nas zaŭsiody chočuć na čymści padłavić? Razumiejecie, my — škoła. My tolki i možam, što prasić, a baćki zaraz składanyja.
Voś jak z hetymi łyžami. Za košt biudžetu nam u škołu zakupili 75 par łyž, da poŭnaha kamplekta nie chapaje jašče 25. Tamu ja na baćkoŭskim schodzie i prasiła baćkoŭ prosta padzialicca łyžami, kali jany ŭ kaho jość. Nu byvaje ž, što stajać na bałkonie biez patreby?
U nas u škole, viadoma, isnuje apiakunski saviet, ale ŭsie ŭnioski ŭ jaho stroha dabračynnyja. Ja mahu prosta nahadać baćkam, što treba pavinšavać z Novym hodam šmatdzietnyja siemji abo ŭpryhožyć škołu. Padkreślu, što ŭsie prapanovy apiakunskamu savietu nosiać rekamiendacyjny charaktar. Nie chočacie płacić — nie treba», — padsumavała Ludmiła Haviaza.
