Ministr zamiežnych spraŭ Biełarusi Uładzimir Makiej na 26-m pasiadžeńni Savieta ministraŭ ABSIE 5 śniežnia ŭ Bracisłavie zajaviŭ pra nieabchodnaść novaha płana dla ŭmacavańnia jeŭrapiejskaj biaśpieki, paviedamlaje BiełTA.
«Miru ciažka dasiahnuć, ale jon moža być parušany zanadta lohka. Nam patrebny novy «płan Maršała» dla jeŭrapiejskaj biaśpieki — płan, kali ŭsie dziaržavy-ŭdzielnicy inviestavali b u stvareńnie nadziejnych miechanizmaŭ biaśpieki ŭ našym rehijonie», — zajaviŭ Uładzimir Makiej.
Kiraŭnik zamiežnapalityčnaha viedamstva padkreśliŭ, što 30 hadoŭ tamu Paryžskaja chartyja dla novaj Jeŭropy abviaściła pryncyp niepadzielnaj biaśpieki, jaki pastaviŭ pierad saboj metu rastapić lod niedavieru i pabudavać adzinuju Jeŭropu. «Ci spraŭdzilisia našy ahulnyja spadziavańni? Na žal, nie. Chraničny kryzis davieru, pasłableńnie režymaŭ kantrolu nad uzbrajeńniami, chutkaje naroščvańnie vajskovaha patencyjału, pašyreńnie palityčnaha i ideałahičnaha razryvu — voś sapraŭdnyja składniki katastrofy», — kanstatavaŭ ministr.
«Biełaruś hatovaja inviestavać, naroŭni ź inšymi dziaržavami-adnadumcami, u pošuk rašeńniaŭ dla pierakładu panujučaj paradyhmy kanfliktu ŭ paradyhmu biaśpieki na asnovie supracoŭnictva, zasnavanaha na ŭzajemadziejańni», — zajaviŭ ministr zamiežnych spraŭ.
Na jaho dumku, nielha niedaaceńvać rolu małych i siarednich krain. Jany pavinny być paŭnapraŭnymi ŭdzielnikami dyjałohu pa pytańniach biaśpieki, kab paźbiehnuć novaha padziełu Jeŭropy na śfiery ŭpłyvu.
«Niadaŭniaje spynieńnie dziejańnia Damovy ab likvidacyi rakiet siaredniaj i mienšaj dalokaści praciahvaje vielmi niebiaśpiečnuju tendencyju da eskałacyi vajennaj napružanaści ŭ Jeŭropie», - pierakanany kiraŭnik biełaruskaha MZS.
A z ulikam taho, što kibierprastora ŭsio bolš stanovicca arenaj kanfrantacyi, Biełaruś prapanavała sfarmavać pojas ličbavaha dobrasusiedstva šlacham zaklučeńnia mižnarodnych pahadnieńniaŭ pa kibierbiaśpiecy, anałahičnych pahadnieńniam ab dadatkovych mierach umacavańnia davieru i biaśpieki ŭ vajskova-palityčnaj śfiery.