21-hadovaja žycharka Navapołacka, papaŭniajučy svaju apłatnuju kartku ŭ adździaleńni «Biełpošty», pakłała na jaje 320 rubloŭ. Ale padčas praviadzieńnia płaciažu paštarka vypadkova nacisnuła na kłavijatury kampjutara lišni nul, i ŭ vyniku na rachunak dziaŭčyny ŭpała suma ŭ 3200 rubloŭ, paviedamlaje abłasnaja milicyja.
Uviečary navapałačanka vyjaviła, što stała ŭładalnicaj vialikaj sumy. I jana stała dziejničać: chutka pieraviała hrošy na svaju zarpłatnuju kartku, a taksama kartku svajho maładoha čałavieka.
Supracoŭniki pošty, vyjaviŭšy niastaču, spačatku pasprabavali viarnuć hrošy praz bank, a paśla niaŭdačy tam źviarnulisia pa dapamohu ŭ milicyju. Pravaachoŭniki vyśvietlili, chto staŭ uładalnikam srodkaŭ.
Spačatku dziaŭčyna kazała, što papoŭniła svoj rachunak 3200 rublami. Paśla pad ciažaram dokazaŭ pryznałasia, što hrošy dastalisia joj z-za čužoj pamyłki. U dačynieńni da jaje zaviedziena kryminalnaja sprava pa častcy 1 artykuła 209 KK (machlarstva).
UUS Viciebskaha abłvykankama papiaredžvaje: kali vam pamyłkova byli zaličany srodki, jakija vam nie naležać, to paviedamicie pra heta ŭ bank. A kali vy patracicie čužyja hrošy, to ŭ dačynieńni da vas moža być raspačata kryminalnaja sprava.
