Ministerstva finansaŭ padrychtavała prajekt ukaza ab źmienie isnujučaj sistemy vypłaty dziaržpošliny za dostup transpartnych srodkaŭ da ŭdziełu ŭ darožnym ruchu. Jon praduhledžvaje ŭviadzieńnie zamiest dziaržpošliny płaty, jakaja budzie nasić niepadatkovy charaktar, u tym ža pamiery, jaki dziejničaje ciapier, zajaviŭ u efiry prahramy «Tydzień» telekanała STV ministr finansaŭ Maksim Jermałovič, paviedamlaje Tut.by.
— Ale pry hetym my ŭparadkavali lhoty, stvaryli miechanizmy stymulavańnia hramadzian na vypłatu hetaha zboru na praciahły pieryjad. Dali prava hramadzianam vypłačvać hety zbor na minimalny termin — adzin miesiac. I jon adviazany ad techahladu aŭtamabila, — adznačyŭ Jermałovič.
Ź inšaha boku, dadaŭ jon, dziaržava ŭzmacniaje kantrol za hetymi płaciažami.
Pytańnie ab tym, jak spahaniać hety zbor, abmiarkoŭvałasia daŭno. Jość apanienty, jakija ličać, što prapanavany Minfinam miechanizm dosyć składany.
— I samym prostym i spraviadlivym ličać uklučeńnie ŭsioj finansavaj nahruzki pa darožnym budaŭnictvie ŭ košt aŭtamabilnaha paliva praz pavieličeńnie akcyzaŭ albo ŭviadzieńnie niejkaha dadatkovaha padatku na aŭtamabilnaje paliva, — dadaŭ Jermałovič.
Ale ŭ hetym vypadku rost cany skłaŭ by bolš za 10 kapiejek na kožnym litry.
— I ŭsia hetaja nahruzka, jakaja składaje sotni miljonaŭ rubloŭ, praz paliva raźmiarkoŭvajecca praktyčna na ŭsie tavary, jakija pieravoziacca, uklučna z charčovaj hrupaj. Adpaviedna, heta pryviadzie da ahulnaha rostu koštaŭ na charčovyja tavary. To bok ludzi, u jakich niama aŭtamabilaŭ, zapłaciać hety zbor. U jakich jość aŭtamabili — zapłaciać i praz paliva, i praz pradukty charčavańnia. Hetaja sistema ŭ kančatkovym vyniku dla hramadzian budzie najmienš spraviadlivaj. My potym nie budziem razumieć, chto ŭ vyniku zapłacić hetuju dziaržpošlinu, — arhumientavaŭ ministr.
Pavodle jaho acenki, projdzie jašče adno abmierkavańnie, na jakim budzie pryniata kančatkovaje rašeńnie.
