Alaksandr Łukašenka 2-3 śniežnia budzie z aficyjnym vizitam u Sierbii. Pra heta BIEŁTA paviedamili ŭ pres-słužbie kiraŭnika Biełarusi.
Fota z archiva pres-słužby prezidenta
U Białhradzie Alaksandr Łukašenka praviadzie pieramovy z prezidentam Sierbii Alaksandram Vučyčam. Na sustrečy ŭ vuzkim i pašyranym kołach kiraŭniki dziaržaŭ abmiarkujuć raźvićcio palityčnaha dyjałohu i ekanamičnaha ŭzajemadziejańnia pamiž krainami.
«Asablivuju ŭvahu prezidenty nadaduć pierśpiektyvam pavieličeńnia tavaraabarotu, inicyjatyvam pa stvareńniu sumiesnych vytvorčaściej i zapusku ŭzajemnych inviestycyjnych prajektaŭ. Taksama abmiarkujuć rehijanalny i suśvietny paradak dnia, supracoŭnictva na mižnarodnych placoŭkach», — raspaviali ŭ pres-słužbie. Pa vynikach pieramovaŭ budzie padpisany pakiet dvuchbakovych dakumientaŭ.
Prahramaj vizitu Alaksandra Łukašenki praduhledžana jaho sustreča sa staršynioj Narodnaj skupščyny Sierbii Majaj Hajkovič i deputatami vyšejšaha zakanadaŭčaha i kanstytucyjnaha orhana krainy.
U hetyja ž dni ŭ Białhradzie projdzie biełaruska-sierbski biznes-forum, na jakim čakajecca padpisańnie kamiercyjnych kantraktaŭ i pahadnieńniaŭ.
Apošni raz prezidenty Biełarusi i Sierbii bačylisia ŭ červieni hetaha hoda: Alaksandr Vučyč prylataŭ u Minsk, kab naviedać II Jeŭrapiejskija hulni.
U Sierbii dziejničajuć linii pa zborcy traktaroŭ MTZ i aŭtobusaŭ MAZ, viadziecca praca pa stvareńni sumiesnaj vytvorčaści kambajnaŭ «Homsielmaš» u Krahujevacy. Ažyćciaŭlajecca prajekt pa vypusku dla MUS Sierbii 33 pažarnych mašyn na bazie šasi MAZ.
Na terytoryi Biełarusi serbskaja kampanija «Dana Chołdynh» praciahvaje realizacyju bujnych budaŭničych prajektaŭ — «Majak Minska» i «Minsk-Mir». Usiaho ŭ Biełarusi zarehistravana 7 arhanizacyj z udziełam sierbskaha kapitału.
Čytajcie taksama:
Vučyč raspavioŭ, jak były prezident Sierbii chavaŭsia ad Łukašenki
