Prezident Sierbii Alaksandr Vučyč u pieradačy na miascovym telebačańni raspavioŭ, jak eks-kiraŭnik krainy Barys Tadzič chavaŭsia ad biełaruskaha kalehi Alaksandra Łukašenki ŭ restaranie. Situacyja ŭspłyła na fonie skandału ŭ Sierbii praz aficyjny vizit prezidenta Biełarusi ŭ krainu na nastupnym tydni, piša Tut.by.
Alaksandr Łukašenka i Alaksandr Vučyč. Fota pres-słužby kiraŭnika Biełarusi
— Ja z zadavalnieńniem prymu Łukašenku! Heta čałaviek, jaki zaŭsiody byŭ razam z narodam Sierbii. Ni ŭ adnym svaim vystupie jon nie byŭ suprać Sierbii, nikoli nie hałasavaŭ suprać Sierbii! I jak ža my jaho nie prymiem?
Tadzič [eks-prezident Sierbii — Red.] chavaŭsia ad jaho ŭ restaranie na «Kapaoniku» [kurort u Sierbii]. Kazaŭ, kali jon [Łukašenka] kataŭsia na łyžach: «My nie možam bačycca na publicy!». Ja nie budu chavacca i vieści tajemnyja pieramovy. Jak my nie prymiem lidara brackaj krainy? Jak ja mahu nie pryniać takich siabroŭ, tolki kab mianie nichto nie staŭ vinavacić? — pierakład pramovy Vučyča pryvodzić Telegram-kanał Puł Pieršaha.
Tak kiraŭnik Sierbii adreahavaŭ na pazicyju staršyni Demakratyčnaj partyi Sierbii Sandy Raškovič-Ivič z nahody vizitu ŭ krainu prezidenta Biełarusi. U prahramie zapłanavana sustreča Łukašenki sa staršynioj Narodnaj skupščyny [parłamienta —Red.] Sierbii Majaj Hajkovič i deputatami.
Sanda Raškovič-Ivič zajaviła, što praz pazicyju Łukašenki pa Kosavie [Minsk niezaležnaść Kosava nie pryznaje — Red.], prezident Sierbii pavinien pryniać hościa, ale sustreča biełaruskaha prezidenta ź miascovymi deputatami — ździek z demakratyi, pieradaje Danas.
— U Biełarusi ŭ parłamiencie niama apazicyi. Viasnoj, mabyć, pierad parłamienckimi vybarami ŭ nas vystupić Kim Čen Yn, kab padzialicca z režymam vopytam i pieradać viedy pra vybarčyja pracesy, — zajaviła palityk. Vučyč prysaromiŭ Raškovič-Ivič za takija vykazvańni.
Što tyčycca historyi z eks-prezidentam Tadzičam, to Łukašenka sapraŭdy jeździŭ katacca na łyžach u Sierbiju ŭ sakaviku 2009 hoda. Prezident i jaho śvita žyli ŭ hateli «Hrand» u turystyčnym centry «Kapaonik». Tam ža ŭ hety čas, pa dadzienych ŚMI, znachodziŭsia i Tadzič. Ci adbyłasia tady sustreča dvuch prezidentaŭ, nie paviedamlałasia.
