Zdareńnie adbyłosia kala 20:00 u piatnicu 29 listapada. Jak paviedamlajuć vidavočcy, na dziaŭčynu zvaliłasia budaŭničaja aharodža. Paciarpiełuju zabrali ŭ balnicu ŭ ciažkim stanie, piša Hrodna.life.
Na miescy zdareńnia pracuje milicyja i śledčy kamitet.
Budaŭničyja pracy ŭ domie №67 pa vulicy Horkaha prachodziać užo niekalki miesiacaŭ. Śviedkam zdareńnia stała čytačka Hrodna.life Emilija:
— Ja išła z treniroŭki pa vulicy Horkaha i nasuprać Doma navuki i techniki jakraz prachodzić restaŭracyja fasada žyłoha doma. Tam stajaŭ natoŭp ludziej i ja spačatku nie zrazumieła, što adbyvajecca. Dumała, moža budaŭniki pryjechali padniać aharodžu, jakaja ŭpała. Ale kali padyšła bližej, to ŭbačyła łužynu kryvi i ŭ joj dziaŭčynu-błandynku. Ja była ŭ šoku, bo ŭ luby momant što-niebudź moža zvalicca na luboha minaka, i ty navat pra heta nie padazraješ.
Viadoma, što paciarpiełaja była ŭ ciažkim stanie, jaje pavieźli ŭ balnicu. Aficyjnaj infarmacyi pa hetym zdareńni jašče niama.