U Polščy zatrymali troch byłych členaŭ praŭleńnia kampanii EuRoPol GAZ, jakich abvinavačvajuć u składańni niavyhadnych kantraktaŭ na pastaŭku rasijskaha hazu i stratach kampanii, paviedamlaje hienieralnaja prakuratura krainy.
Rehijanalnaja prakuratura ŭ Łodzi viadzie padrychtoŭčuju vytvorčaść pa hazavych pahadnieńniach, zaklučanych z Rasijaj.
U aŭtorak pa patrabavańni prakuratury zatrymali byłych členaŭ praŭleńnia kampanii EuRoPol GAZ — Michała Š., Ździsłava I. i Mirasłava D., jakija ŭvachodzili ŭ skład praŭleńnia z 20 studzienia 2010 da 31 śniežnia 2010 hoda.
Ich abvinavačvajuć u naniasieńni «značnaha ŭronu EuRoPol GAZ šlacham złoŭžyvańnia pradstaŭlenymi paŭnamoctvami abo nievykanańnia abaviazkaŭ». Im pahražaje da 10 hadoŭ pazbaŭleńnia voli.
Kampanija EuRoPol GAZ zasnavana ŭ 1993 hodzie. Jaje akcyjanierami stali «Hazprom» i polskaja naftahazavaja kampanija PGNiG (pa 48 pracentaŭ), jašče čatyry adsotki naležać Gas Trading S.A. EuRoPol GAZ kiruje ŭčastkam hazapravoda «Jamał — Jeŭropa» praciahłaściu 684 kiłamietry.
Sprava tyčycca zaklučeńnia mižuradavaha pahadnieńnia ŭ studzieni 2010 hoda, niavyhadnaha dla Polščy, jakoje supiarečyć zakanadaŭstvu ES ab pastaŭkach rasijskaha hazu ŭ Polšču.
Prakuratura śćviardžaje, što svaimi dziejańniami zatrymanyja pryviali da materyjalnaj škody kampanii EuRoPol GAZ na ahulnuju sumu bolš za 848 młn złotych.
