Biełarusy skardziacca, što ŭ apošni čas polskija mytniki stali čaściej anulavać čeki Tax Free, tak zvanyja lubimyja kožnym žycharom pamiežža «vaty». U pryvatnaści, z takimi prablemami ŭžo nie raz sutyknulisia žychary Bresta, jakija pierasiakajuć miažu praz KPP «Varšaŭski most — Ciarespal». Supracoŭniki mytna-padatkovaj słužby Polščy kažuć: usio pa zakonie, piša Tut.by.
Maryja (imia źmieniena pa prośbie žančyny) raspaviadaje, što ŭ Polšču jeździć prykładna raz na tydzień i praktyčna kožny raz pa viartańni ŭ Biełaruś afarmlaje jakija-niebudź tavary pa sistemie Tax Free.
— Tak, ja časta viazu praź miažu niejki tavar. Ale heta nie dla prodažu. Čaściej za ŭsio dla siabie i pa prośbie siabroŭ: parašok, kava, šakaład, - raspaviadaje žančyna.
U čarhovy raz Maryja viartałasia z Polščy nočču 21 listapada. Miažu pierasiakała na «Varšaŭcy».
— U mašynie było 4 čałavieki: ja, muž i jaho siabar, jakija viartalisia z pracy ŭ Polščy, i śviakroŭ. Kupili pradukty, «vaty» vyrašyli aformić na mianie, bo śviakroŭ naŭrad ci ŭ najbližejšy čas pajedzie ŭ Polšču, muž - taksama. Atrymałasia, što ja viezła 35 plitak šakaładak, niekalki pačkaŭ kavy, pralny parašok. I voś — anulavańnie Tax Free. Ja pasprabavała rastłumačyć, što kupiła ŭsio heta na padarunki, kava - taksama na niekalki siemjaŭ. Ale polski mytnik byŭ niepachisny, paraiŭ źviarnucca da načalstva. Ale heta try hadziny nočy, na miescy nikoha nie akazałasia. Tak my i pajechali, — kaža Maryja.
Inšaja žycharka Bresta raspaviadaje, što pry joj na miažy ŭ apošni čas było niekalki admovaŭ u afarmleńni Tax Free.
— Ludzi kazali, što vieźli niejkuju bytavuju techniku. Praŭda, miesiacy try tamu taksama vieźli padobnyja adzinki tavaru. Moža być, mienavita ŭ hetym i jość pryčyna anulavańnia, - kaža žančyna.
U tielehram-kanale Miaža BY! ludzi abmiarkoŭvajuć, što anulavańnie čekaŭ Tax Free na miažy nosić masavy charaktar - i adbyvajecca heta pieravažna ŭ Ciarespali.
A ŭ Hrodnie, naprykład, pra takuju prablemu pakul nie čuli — heta značyć, kali takija anulavańni i byli, to nasili tolki adzinkavy charaktar.
Palaki ža tłumačać: usio pa zakonie.
- Supracoŭniki mytnaj słužby majuć dostup da bazy, dzie vidać, kali afarmlalisia dakumienty pa viartańni PDV apošni raz u kankretnaha čałavieka. I kali mytnik vyśviatlaje, što hetaja asoba ŭ apošni čas, pierasiakajučy miažu, časta pieravoziła tavar adnoj i toj ža katehoryi, to maje prava anulavać dakumient Tax Free. Naprykład, havorka idzie pra vypadki, kali na praciahu 2 ci 3 miesiacaŭ čałaviek vioz 5 pralnych mašyn (i afarmlaŭ viartańnie PDV na hety tavar) abo kožnyja dva dni pravozić pa 20 kiłahramaŭ kavy i taksama afarmlaje viartańnie padatku.
Varta razumieć, što Tax Free afarmlajecca tymi padarožnikami, jakija robiać pakupki dla asabistych metaŭ. A kali čałaviek za niepraciahły pieryjad času viazie adnolkavy tavar, to jość vialikaja vierahodnaść, što ŭsio heta pieravozicca ŭ metach dalejšaha prodažu. Tamu supracoŭnik, praanalizavaŭšy źviestki, maje poŭnaje prava anulavać dakumient Tax Free — i robić heta ŭ ramkach dziejučaha zakanadaŭstva. Pry hetym tavar nie zatrymlivajecca, jaho svabodna možna pravozić praź miažu, — patłumačyła TUT.BY pres-sakratar administracyi padatkovaj słužby Lublinskaha mytna-padatkovaha kiravańnia Marta Špakoŭskaja.
