Dziaržaŭny sakratar Rady biaśpieki Biełarusi Stanisłaŭ Zaś raspavioŭ žurnalistam ab vynikach praviedzienaj u Łukašenki narady pa raźvićci sistemy uradavaj suviazi, pieradaje BIEŁTA.
«Lubaja sistema pavinna być abaroniena ad lubych zamachaŭ. Ciapier adna z zadač, jakaja stajała pierad Apieratyŭna-analityčnym centram (hetaja struktura pa daručeńni prezidenta pravodziła pravierku pracy ŭ śfiery zakrytaj suviazi), — vyjavić uraźlivaści i pasprabavać atrymać dostup da hetaj suviazi. Jany nie zmahli vyrašyć hetuju zadaču», — raspavioŭ dziaržsakratar Rady biaśpieki.
Stanisłaŭ Zaś adznačyŭ, što praviedzienaja razmova — heta vynik pracy, jakaja była praviedziena sioleta ŭ dva etapy pa vyvučeńni stanu spraŭ, vyznačeńni pierśpiektyŭ i vyjaŭleńni prablemnych pytańniaŭ.
Uviesnu była stvorana mižviedamasnaja rabočaja hrupa, jakaja aceńvała efiektyŭnaść vykanańnia dziaržaŭnaj prahramy pa raźvićci ŭradavaj suviazi. «I havorka viałasia nie tolki ŭ tym, kab acanić efiektyŭnaść, paŭnatu asvajeńnia hrošaj, jakija vydzialajucca pa hetaj dziaržprahramie, ale i ŭ cełym acanić situacyju z punktu hledžańnia taho, kab tyja ŭkładańni byli ŭ pravilnym kirunku», — skazaŭ dziaržsakratar.
Padčas druhoha etapa, jaki skončyŭsia nie tak daŭno, siłami Apieratyŭna-analityčnaha centra praviaralisia ŭraźlivaści ŭ sistemie abaronienaj uradavaj suviazi i słabyja miescy, nad jakimi treba papracavać.
«Siońnia abmiarkoŭvalisia vyniki. U cełym razhladali ŭsie siehmienty abaronienaj uradavaj suviazi — jak stacyjanarnuju, tak i mabilnuju», — raspavioŭ Stanisłaŭ Zaś.
Jon adznačyŭ, što ŭ stacyjanarnaj uradavaj suviazi zrobleny značnyja kroki pa raźvićci:
«My poŭnaściu adyšli ad savieckaj spadčyny. Užo na novaj technałahičnaj bazie pabudavanaja ŭsia hetaja sistema. Prytym vykarystoŭvajecca vyklučna biełaruskaja aparatura šyfravańnia, kab harantavać biaśpieku suviazi. I na dadzieny momant stupień łakalizacyi usiaho asnoŭnaha abstalavańnia - 80%. Tut asablivych prablem nie bačycca. Treba prosta ŭdaskanalvać toje, što jość».
Druhi napramak — mabilnaja abaronienaja suviaź. «Heta novaja sprava dla krainy. My z nula pa hetaj temie litaralna niekalki hadoŭ tamu pačali pracavać, stvarać svaju škołu kadraŭ, pravodzić navukovyja i technałahičnyja raspracoŭki», — adznačyŭ dziaržsakratar.
Stanisłaŭ Zaś raspavioŭ, što ŭ ciapierašni čas užo prachodzić zaviaršalny etap testavaj ekspłuatacyi mabilnaj suviazi. Telefonnyja aparaty, vonkava padobnyja na zvyčajnyja, razdadzienyja słužbovym asobam i ŭžo vykarystoŭvajucca.
«Vyznačajucca słabyja miescy. Jość u hetaj suviazi mocnyja baki. Heta biaśpieka — samaje hałoŭnaje.
Jość i słabyja — heta jakaść suviazi. Nad hetym treba budzie papracavać.
Pra heta havaryŭ kiraŭnik dziaržavy, i takija zadačy pastaviŭ. U nastupnym hodzie my pavinny zakryć hetuju temu i zabiaśpiečyć kiraŭnictva krainy jakasnaj abaronienaj mabilnaj suviaźziu «, - zajaviŭ jon.
Adkazvajučy na ŭdakładniajučaje pytańnie BIEŁTA, ci źjavicca ŭ uradavych mabilnikach niejki anałah papularnych miesiendžaraŭ, dziaržsakratar Rady biaśpieki skazaŭ: «Heta pierśpiektyva».
Jon taksama adznačyŭ, što ŭ ciapierašni čas u krainie isnuje i paśpiachova pracuje abaronienaja sistema pieradačy źviestak, jakaja dazvalaje abmieńvacca dakumientami. Stanisłaŭ Zaś taksama padkreśliŭ značny ekspartny patencyjał raspracovak u śfiery ŭradavaj suviazi: «Užo jość patencyjnyja pakupniki», — skazaŭ jon.
