Biełaruś zacikaŭlena ŭ raźvićci prajektaŭ u realnym siektary ekanomiki z Abjadnanymi Arabskimi Emiratami. Ab hetym Alaksandr Łukašenka zajaviŭ siońnia na sustrečy sa staršynioj rady dyrektaraŭ inviestycyjnaj kampanii Emaar Properties Muchamiedam Ali Al-Abaram, pieradaje BIEŁTA.
«My možam abmierkavać ciapier tyja prajekty, jakija znachodziacca ŭ prapracoŭcy. Ale mianie bolš cikaviać prajekty ŭ realnym siektary ekanomiki», — pryznaŭsia Łukašenka.
Muchamied Ali Al-Abar — saŭładalnik bujnych mižnarodnych kampanij u śfierach inviestycyj, nieruchomaści, haściničnaha biznesu, elektronnaha handlu, łahistyki, hramadskaha charčavańnia, mody i inšych. Jaho biznes prysutničaje bolš čym u 50 krainach śvietu, ułasny kapitał aceńvajecca ŭ $ 4,6 młrd. Jon źjaŭlajecca idejnym natchnialnikam i vykanaŭcam kancepcyi stvareńnia sučasnaha Dubaja, klučavym daradcam pa ekanamičnym i inviestycyjnym pytańniach (asabistym i dziaržaŭnym) kiraŭnikoŭ Abu-Dabi i Dubaja.
Kampanija Emaar Properties — adzin z najbujniejšych u śviecie deviełapieraŭ i inviestaraŭ u halinie budaŭnictva. Jaje štab-kvatera znachodzicca ŭ Dubai. Kampanija vałodaje bolš čym 60 daččynymi arhanizacyjami i prysutničaje na rynkach zvyš 35 krain na Blizkim Uschodzie, u Paŭnočnaj Afrycy, Azii, Jeŭropie i Paŭnočnaj Amierycy.
Emaar Properties śpiecyjalizujecca na haściničnym biznesie, handlova-zabaŭlalnaj infrastruktury, zdačy ŭ arendu kamiercyjnaj nieruchomaści, raźvićci infarmacyjna-kamunikacyjnych technałohij i pasłuh dla roznych śfier biźniesu, inviestavańni i absłuhoŭvańni nieruchomaści. Najbujniejšyja budaŭničyja prajekty Dubaja, uklučajučy samaje vysokaje ŭ śviecie budynak «Burdž-Chalifa» i adzin z najbujniejšych handlovych centraŭ «Dubaj Moł», byli realizavany mienavita Emaar Properties.
