Jak pieradaje haradzienskaja «Viasna», u miastečku Baruny, što na Ašmianščynie, u miascovym sanktuaryi 9 listapada ŭračysta adznačyli 30 hadoŭ z času, kali adbyłosia pieršaje paśla doŭhaha pierapynku nabaženstva z udziełam hreka-katalickaj moładzi. Tady da miascovaha śviatara, śvietłaj pamiaci Jana Matusieviča pryjechała intelihiencyja ź Miensku. Byŭ pakładzieny pačatak adradžeńnia ŭnijackaj kanfiesii ŭ Biełarusi.
Na ŭračystaść u Baruny pryjechali vierniki z Harodni, Miensku, Maładečna, Ivacevičaŭ. Adbyłasia ŭračystaja imša, jakuju ŭznačaliŭ apostalski vizitatar dla hreka-katalikoŭ Biełarusi archimandryt Siarhiej Hajek. Jamu dapamahli inšyja ŭnijackija śviatary Biełarusi. Potym Iryna Dubianieckaja skłała śviedčańnie z padziei 30-hadovaj daŭniny. Vierniki paśla ŭračystaha nabaženstva mieli mahčymaść nabrać vady z barunskaj žyvatvornaj krynicy, a taksama ahledzieć kaścioł i były klaštar bazyljanaŭ. Na žal, budynak klaštaru znachodzicca zaraz nie ŭ lepšym stanie. Kaścioł ža poŭnaściu restaŭravany i dzieić.
Haradzienskija pilihrymy z parafii Maci Božaj Facimskaj naviedali pa darozie ŭ Baruny Halšany, a pa darozie nazad — miastečka Traby.
