Zdareńnie adbyłosia 22 kastryčnika, paviedamlaje Pamiežny kamitet.
Kala kramy ŭ centry ahraharadka «Pahraničny» Bierastavickaha rajona da vučnia 9-ha kłasa Maksima Kaplinskaha źviarnuŭsia mužčyna z zaplečnikam.
Jaho cikaviła, u jakim baku znachodzicca miaža z Polščaj i kolki da jaje kiłamietraŭ. Školnik nie razhubiŭsia i pakazaŭ niapravilny kirunak, a sam pabieh telefanavać pamiežnikam. Zatym praciahnuŭ nazirać za patencyjnym parušalnikam miažy da prybyćcia tryvožnaj hrupy.
U vyniku mužčyna byŭ zatrymany. Vyśvietliłasia, što heta 25-hadovy ŭradženiec Kurhanskaj vobłaści, u 2017 hodzie jon užo sprabavaŭ parušyć biełaruskuju miažu, za što byŭ departavany z zabaronaj ujezdu ŭ našu krainu terminam na piać hadoŭ.
Zaraz niaŭdały parušalnik znachodzicca ŭ izalatary časovaha ŭtrymańnia Hrodzienskaj pamiežnaj hrupy. Jamu pahražaje da troch hadoŭ pazbaŭleńnia voli.
Pamiežny kamitet paviedamlaje, što vyjavić i dapamahčy zatrymać padazronaha čałavieka ŭ pamiežnaj zonie Maksimu Kaplinskamu dapamahli viedy, jakija jon nabyŭ u atradzie «Juny siabar pamiežnikaŭ».
Kamandavańnie zastavy «Pahraničny» i Hrodzienskaj pahranhrupy padziakavała Maksimu za prajaŭlenuju pilnaść i aktyŭnuju hramadzianskuju pazicyju, a jaho baćkam — za hodnaje vychavańnie syna.
