Takaja niepryjemnaja historyja adbyłasia z žycharkaj Mahiloŭskaj vobłaści. Žančyna jechała ciahnikom na pachavańnie ŭ Hrodna, piša Źviazda sa spasyłkaj na hrodzienskuju milicyju.
Pajezdka prachodziła spakojna, tamu hramadzianka nieŭzabavie zasnuła, a pračnułasia ŭžo na padjeździe da horada nad Niomanam. I tady sa ździŭleńniem vyjaviła, što źnikli jaje krasoŭki, jakija jana pakinuła pad palicaj. Jašče bolšuju składanaść situacyi dadało toje, što pajezdka była karotkaterminovaj, i ŭ žančyny bolš nie było z saboj abutku.
Ab tym, što zdaryłasia, pasažyrka paviedamiła pravadnikam. Kali ciahnik prybyŭ na stancyju ŭ Hrodna, treba było vyrašać jašče adno pytańnie: jak biez abutku pakinuć vahon. Žančynie navat prapanoŭvali varyjant z bachiłami, ale, na ščaście, u ludziej z susiedniaha kupe znajšlisia zapasnyja tepciki.
Užo ŭ pakoi milicyi paciarpiełaja dačakałasia svajakoŭ, jakija pryvieźli abutak pa siezonie, tam ža raspaviała pravaachoŭnikam ab tym, što zdaryłasia. Supracoŭniki Hrodzienskaha AUST apytali pasažyraŭ i vyśvietlili, što da zhuby abutku žančyny moža być datyčnaja hramadzianka, jakaja jechała razam ź joj u kupe. Milicyjaniery ŭstanavili, što pasažyrka vyjšła ŭ Iŭjeŭskim rajonie, a nieŭzabavie pa miescy žycharstva byŭ znojdzieny i vykradzieny abutak.
U adździaleńni infarmacyi i hramadskich suviaziaŭ UUS Hrordzienskaha abłvykankama adznačyli toj fakt, što pravavaja acenka tamu, što adbyłosia, mahła davacca ŭ ramkach kryminalnaha kodeksu, pakolki paciarpiełaja pieršapačatkova śćviardžała, što krasoŭki byli nie samaj tannaj firmy Reebok. Adnak supracoŭniki Hrodzienskaha AUST, vyjaviŭšy vykradzieny abutak, vyznačyli, što jon nie firmovy, a niedarahi vyrab, jaki nie maje dačynieńnia da vyšejzhadanaha brendu. Tamu sprava razhladałasia ŭ ramkach kodeksa ab administracyjnych pravaparušeńniach. Za padobnyja dziejańni adkaznaść praduhledžana pa artykule «Drobny kradziež».
