Lidar terarystyčnaj arhanizacyi «Isłamskaja dziaržava» Abu Bakr al-Bahdadzi likvidavany padčas apieracyi ŭ Idlibie (Siryja). Pra heta zajaviŭ prezident ZŠA Donald Tramp, pieradaje Reuters.
Apieracyjaj pa jaho likvidacyi zajmalisia siły śpiecyjalnych apieracyj ZŠA. Pa słovach Trampa, padčas śpiecapieracyi amierykanskija vajennyja «zahnali» al-Bahdadzi ŭ tupikovy tunel. Uciakajučy ad vajskoŭcaŭ, lidar ID padarvaŭ pojas śmiarotnika, zabiŭšy pry hetym troch svaich dziaciej.
Al-Bahdadzi pamior jak sabaka, jak bajaźliviec, skazaŭ Tramp. «Jon sprabavaŭ schavacca ŭ tuneli, ź jakoha nie było vyjścia, płačačy, hałosiačy i kryčučy». U budynku zastavaŭsia tolki Bahdadzi i troje dziaciej, jakich jon uziaŭ z saboj i pavioŭ na viernuju śmierć. Kali našy psy dahnali jaho ŭ tuneli, jon padarvaŭ kamizelku na sabie, zabiŭšy siabie i traich dziaciej.
Ułady ZŠA praviali identyfikacyju pareštkaŭ, jakaja pakazała, što byŭ źniščany mienavita lidar ID. Padčas apieracyi była zabita vialikaja kolkaść paplečnikaŭ al-Bahdadzi. Na miescy śpiecapieracyi taksama znachodzilisia 11 dziaciej, jany paciarpieli.
Padčas śpiecapieracyi nie paciarpieŭ nivodny amierykanski vajenny, skazaŭ Tramp.
Dla praviadzieńnia śpiecapieracyi ZŠA prasili Rasiju dazvolić amierykanskim viertalotam pralacieć nad terytoryjaj Siryi. Rasijskija vajskoŭcy nie viedali pra mety apieracyi, skazaŭ amierykanski prezident.
Jak pisała Reuters kiraŭnik terarystyčnaj arhanizacyi prybyŭ u siryjskuju viosku Baryš za dvoje sutak da śmierci. Tam amierykancy zdoleli jaho vysačyć. Pa dadzienych Anadolu apieracyja pa likvidacyi kiraŭnika ID doŭžyłasia čatyry hadziny — pieršyja paŭtary pravodziŭsia abstreł nasielenaha punkta z pavietra, potym pačałasia naziemnaja častka apieracyi.
Raniej kurdski hienierał «Siryjskich demakratyčnych sił» paviedamiŭ ab praviadzieńni histaryčnaj vajennaj apieracyi sumiesna z amierykanskaj raźviedkaj. Rašeńnie ab praviadzieńni hetaj apieracyi było pryniata paśla infarmacyi ab źjaŭleńni al-Bahdadzi ŭ siryjskaj pravincyi Idlib.
