Novymi ŭładalnikami futbolnaha kłuba «Dynama-Minsk», pa infarmacyi Tut.by, stanuć niekalki biełaruskich IT-kampanij, u tym liku kampanija viadomaha biznesmiena Viktara Prakapieni. Pavodle infarmacyi krynicy ŭ IT-halinie, pieramovy ab hetym praciahvalisia kala troch miesiacaŭ.
Raniejšy klučavy ŭładalnik «Dynama» (57% akcyj) Juryj Čyž, jaki vałodaŭ im kala 20 hadoŭ, straciŭ dolu ŭ kłubie ŭ mai 2019 hoda pa rašeńni suda. U apošni čas biudžet kłuba farmavaŭ horad.
«U apošni čas prezident vielmi łajalny da prapanoŭ ajcišnikaŭ. Jość damoŭlenaść, što jany buduć spansiravać kłub, jaki pavinien narešcie zajhrać i pakazać hodny vynik», — adznačyŭ surazmoŭca, znajomy z chodam pieramovaŭ.
Cikava, što ŭ subotu Viktara Prakapieniu z synam bačyli na matčy «Dynama» z «Viciebskam», jaki minčanie prajhrali ź likam 0:2. Paśla pieršaha tajma, u jakim «Dynama» prapuściła adzin miač (pa ironii losu, jaho zabiŭ hulec «Viciebska» Arciom Hurenka, syn hałoŭnaha treniera «Dynama-Minsk»), biznesmen pakinuŭ trybunu.
«Jon da matča vystupaŭ na forumie «Biznes-Abudžeńnie», tam na «Čyžoŭka-Arenie» było 7000 čałaviek. A tut — pusty stadyjon, dźvie tysiačy hledačoŭ. Vynik jon nijak nie prakamientavaŭ, kanca matča nie dačakaŭsia», — raspaviała krynica.
Viktar Prakapienia ŭ sieradu byŭ niedastupny dla kamientara.
Siarod pretendentaŭ na «Dynama» nazyvali rasijskaha biznesoŭca Michaiła Huceryjeva i Uładzimira Japryncava, byłoha kampańjona Čyža pa «Trajple».
Paźniej dev.by paviedamiŭ, što Viktar Prakapienia i jaho kampanii nie stanuć ułaśnikami «Dynama». Pavodle infarmacyi sajta, pieramovy ab kupli doli ŭ futbolnym kłubie zaviaršylisia, ale ŭhody nie budzie