Pres-sakratarka Alaksandra Łukašenki Natalla Ejsmant zajaviła, što źviestki pra zatrymańnie rasijanki Hanny Bahačovaj u Minsku nie adpaviadajuć rečaisnaści. Pra heta jana paviedamiła Telegram-kanału «Podjem».
Ejsmant padkreśliła, što vakoł źviazanych z Bahačovaj padziej źjaŭlajucca šmatlikija interpretacyi, jak u samoj Biełarusi, tak i za jaje miežami. «Tamu ŭ čarhovy raz zajaŭlaju: zatrymańnie nie pravodziłasia pa zapycie ZŠA — zatrymańnia nie było ŭvohule!» — skazała jana, padkreśliŭšy, što hetaja infarmacyja źjaŭlajecca «absalutna dakładnaj». Pres-sakratarka biełaruskaha lidara taksama zaklikała rasijan «nikoha nie bajacca» i pryjazdžać u Biełaruś.
Čytajcie taksama: Rasijanka Bahačova, jakuju zatrymlivali ŭ Minsku pa zapycie ZŠA, znachodzicca na voli
Pra zatrymańnie Hanny Bahačovaj u Minsku stała viadoma ranicaj 15 kastryčnika. Paźniej infarmacyju paćvierdzili ŭ MZS Rasii; člen Hramadskaj pałaty Alaksandr Malkievič udakładniŭ, što žančynu zatrymaŭ Interpał pa zapycie ZŠA ŭ ramkach spravy ab umiašańni Rasii ŭ amierykanskija prezidenckija vybary 2016 hoda.
Hanna Bahačova — supracoŭnica pieciarburhskaha «Ahienctva internet-daśledavańniaŭ» (h.zv. «fabryki trolaŭ») — razam ź jašče 12 rasijanami abvinavačvajecca Miniustam ZŠA va ŭmiašańni ŭ amierykanskija vybary. Siarod abvinavačanych fihuruje biznesmen Jaŭhien Pryhožyn, što, jak i Bahačova, znachodzicca pad sankcyjami ZŠA. Amierykanskija ŭłady źviazvajuć «Ahienctva internet-daśledavańniaŭ» sa strukturami, jakija majuć dačynieńnie da Pryhožyna.
