Alaksandr Łukašenka 15 kastryčnika pryznačyŭ kiraŭnikoŭ u try rajony krainy. «Naša Niva» znajomić vas z tymi, chto ŭznačaliŭ Dubrovienski, Mścisłaŭski rajony i Maskoŭski rajon Minska.
Taćciana Kaladka (Maskoŭski rajon Minska)
Fota «Minsk-naviny».
Taćciana Kaladka rodam ź vioski Kazłovičy Słuckaha rajona, jakaja ŭvachodziła ŭ kałhas imia Kirava. Heta była adna z najbolš pieradavych haspadarak tahačasnaj BSSR. Baćka pracavaŭ elektrykam, maci — miedsiastroj.
Vučyłasia ŭ politechničnym technikumie ŭ Minsku pa śpiecyjalnaści «prykładnaja matematyka». Potym užo zavočna atrymlivała adukacyju ŭ narhasie — ekanamičnuju i jurydyčnuju.
Muž u Taćciany Kaladka vajskoviec, słužyŭ u Afhanistanie. Potym z žonkaj pažyli ŭ Rastovie-na-Donie i Polščy. Paśla razvału SSSR viarnulisia ŭ Słuck. Tam jana pracavała ŭ śfiery handlu. Tolki ŭ pačatku 2010-ch siamja pierajechała ŭ Minsk. Kaladka ŭładkavałasia va ŭpraŭleńnie ekanomiki Maskoŭskaha rajona stalicy. I pačaŭsia rezki karjerny rost.
Taćciana Kaladka aktyŭničaje ŭ «Biełaruskim sajuzie žančyn». Maje syna i dačku. Ad 2013 hoda była pieršaj namieśnicaj kiraŭnika Maskoŭskaha rajona Minska, chacia sama žyvie ŭ Leninskim rajonie.
Minuły kiraŭnik Maskoŭskaha rajona Andrej Žajłovič u minułym miesiacy byŭ pryznačany kiraŭnikom Salihorskaha rajvykankama.
Anatol Łukašoŭ (Dubrovienski rajon)
Fota «Naša Tałačynščyna».
Unikalny vypadak: Łukašoŭ užo adzinaccać hadoŭ uznačalvaŭ adzin z samych uschodnich rajonaŭ krainy, potym u 2016 staŭ deputatam Pałaty pradstaŭnikoŭ, a ciapier viartajecca ŭ kresła kiraŭnika Dubrovienskaha rajona.
Łukašoŭ naradziŭsia ŭ vioscy Vialiki Bor Branskaj vobłaści, heta sumiežny ź Biełaruśsiu rehijon. Vučycca pajechaŭ u Viciebskuju vieterynarny instytut. Pracavaŭ viarnuŭsia na Branščynu. Tolki praź niejki čas jon pierabirajecca ŭ Dubrovienski rajon Viciebskaj vobłaści, uładkoŭvajecca ŭ saŭhas «Arłovičy».
Adtul jaho ŭžo zaŭvažyli ŭ rajonnym centry. U Dubrovienskim rajvykankamie Łukašoŭ pracavaŭ va ŭpraŭleńni sielskaj haspadarki i charčavańnia. A ŭ 2005 hodzie ŭznačaliŭ rajon.
Cikava, što na parłamienckija vybary 2016 hoda Łukašoŭ išoŭ nie pa svajoj rodnaj, a pa Sieńnienskaj akruzie. Jon zadekłaravaŭ pryvatny dom płoščaj 142 m.kv., a taksama ścipły aŭtamabil «Aŭdzi A6» 2000 hoda vypusku.
Žychary Sianna prasili ŭ deputata, kab jon dapamoh im z pracaj, a taksama źviartalisia nakont ustalavańnia ŭ rajcentry pomnika Piatru Mašeravu. Pomnik, adnak, tak i nie źjaviŭsia.
U Pałacie pradstaŭnikoŭ Łukašoŭ adkazvaŭ za sielskuju haspadarku.
Zvyčajna paśla kadencyi ŭ parłamiencie čynoŭniki iduć na piensijny adpačynak, a tut čałaviek znoŭ viartajecca ŭ «pole».
Dźmitryj Pimašenka (Mścisłaŭski rajon)
Fota «Savieckaja vioska».
Jaho čakaje pierajezd z Drybina, dzie Pimašenka ŭznačalvaŭ rajonny saviet deputataŭ. Sam Pimašenka rodam z Čavuskaha rajona, vučyŭsia ŭ sielskahaspadarčaj akademii ŭ Horkach na ekanamista.
Kaža, što na pracu ŭ Drybinski rajon jechaŭ śviadoma. «Chaciełasia pačać darosłaje žyćcio asobnaje ad baćkoŭ, a tut byli pierśpiektyvy pa pracy i pa atrymańni žylla», — kazaŭ Pimašenka.
Spačatku ŭ Drybinie jon papracavaŭ u struktury «Biełarusbanka». A ŭžo potym atrymaŭ zaprašeńniem z rajvykankama. Namieśnikam staršyni Dźmitryj staŭ u 29 hadoŭ. Ciapier Pimašenku — 44 hady.
Taksama Pimašenka ŭznačalvaje rajonnuju arhanizacyju «Biełaruski fond miru». Jahonaja žonka Anžeła — jany paznajomilisia padčas vučoby ŭ Horkach — apošnija vosiem hadoŭ uznačalvaje finansavy adździeł Drybinskaha rajvykankama.
