Palicyja San-Francyska rasśleduje dziorzki kradziež: siarod biełaha dnia pracu ispanskaha mastaka «Pałajučy žyraf» vynieśli z vystavy, dzie hety afort byŭ centralnym ekspanatam, piša Bi-bi-si
Kalarovy afort aceńvajecca ŭ 20 tysiač dalaraŭ. Vykradańnie było zafiksavana vonkavymi kamierami nazirańnia: dniom u niadzielu čałaviek spartyŭnaha vyhladu ŭ siniaj futbołcy, šortach i biejsbołcy (i navat sa śvistkom na šnurku) spakojna zachodzić u halereju. Praz 32 siekundyjon tak ža pavolna vychodzić ź dźviarej ŭžo z hraviuraj Dali ŭ rukach. Karcina niemaleńkaja — 50 sm na 60 sm.
«Heta byŭ centralny ekspanat našaj śpiecyjalnaj vystavy Salvadora Dali», — raspaviała telekampanii ABC7 dyrektar halerei Anžeła Kielet. «Pałajučy žyraf» (nie adzinaja praca Dali z takoj nazvaj) byŭ vystaŭleny ŭ centry zały na malbiercie.
«Jany jak by prosta zazirnuli ŭ halereju ŭdvaich, vierahodna, dla adciahnieńnia supracoŭnikaŭ, i ŭciakli zanadta chutka, da taho, jak chtości paśpieŭ što-niebudź zaŭvažyć», - kaža Kielet.
Ekspanat pavinien byŭ być prymacavany da malbierta trosam, ale tajamničym čynam ni trosa, ni karabina ŭ momant vykradańnia nie było. Palicyja vyśviatlaje, ci byŭ tros adšpileny złamyśnikami zahadzia (mahčyma, jany ci saŭdzielniki ŭžo zachodzili ŭ halereju pierad hetym) albo złodziej zdoleŭ abrezać tros za tyja 32 siekundy, što jon znachodziŭsia ŭ pamiaškańni.
