Hazieta New York Times sa spasyłkaj na dadzienyja zachodnich śpiecsłužbaŭ paviedamiła ab tym, što na Zachadzie pryjšli da vysnovy, što za roznymi akcyjami pa destabilizacyi situacyi ŭ Jeŭropie staić sakretnaje śpiecpadraździaleńnie Hałoŭnaha ŭpraŭleńnia Hienštaba (byłoha HRU). Śćviardžajecca, što havorka idzie pra śpiecyjalistaŭ z vajskovaj častki 29 155 jakija śpiecyjalizujucca na sabatažy i padryŭnoj dziejnaści, piša rbc.ru.
Na dumku śpiecyjalistaŭ z vyviedsłužbaŭ u čatyroch krainach Zachadu, mienavita dadzienaja voinskaja čaść staić za atručvańniem byłoha aficera HRU Siarhieja Skrypala i jaho dački ŭ anhlijskim Sołśbiery, a taksama za sprobaj pieravarotu ŭ Čarnahoryi. Jak pakazvaje NYT, u zachodnich śpiecsłužbach pabačyli suviaź pamiž hetymi padziejami, adnak papiaredzili, što zusim niemahčyma pradbačyć, kali i dzie bajcy śpiecpadraździaleńnia źjaviacca ŭ nastupny raz.
Surazmoŭcy NYT pakazvajuć, što ŭ častcy 29 155 słužać ludzi, jakija prajšli vojny ŭ Afhanistanie, Čačni i va Ukrainie. «Ich apieracyi nastolki sakretnyja, što pra isnavańnie hetaha padraździaleńnia nie viedajuć navat u inšych adździełach HRU», - śćviardžajuć krynicy haziety. Pry hetym u haziecie nazyvajucca mierkavanyja kiraŭniki: hienierał-major Andrej Aviarjanaŭ i Anatol Čapiha. Apošniaha padazrajuć u tym, što mienavita jon udzielničaŭ u atručvańni Skrypaloŭ.
Pry hetym adzin z pradstaŭnikoŭ jeŭrapiejskich śpiecsłužbaŭ u kamientary haziecie vykazaŭ ździŭleńnie ŭ suviazi z tym, što pradstaŭniki śpiecpadraździaleńnia na praciahu mnohich hadoŭ mahli svabodna pieramiaščacca pa Jeŭropie. Tak, naprykład, za hod da padziej u Sołśbiery troje apieratyŭnikaŭ HRU nibyta pryjazdžali ŭ Vialikabrytaniju ahladać miascovaść. Adnym ź ich, pa dadzienych zachodnich śpiecsłužbaŭ byŭ Alaksandr Miškin, jaki paźniej pradjaŭlaŭ dakumienty na imia Alaksandra Piatrova. Razam ź im u Anhlii pabyvali i dvoje mužčyn, jakija nazyvali siabie Fiodaravym i Paŭłavym. Apošnija padazrajucca ŭ datyčnaści da zabojstva bałharskaha handlara zbrojaj Emilijana Hiebreva ŭ 2015 hodzie.
Jak adznačaje vydańnie pres-sakratar rasijskaha prezidenta ŭsie pytańni pieraadrasavaŭ ŭ Ministerstva abarony RF, a ŭ vajennym viedamstvie na zapyty haziety nie adkazali.
